Portada Política La XDLA critica la “inconcrección” de les midíes de política llingüística anunciaes pola Conseyera d’Educación y Cultura

La XDLA critica la “inconcrección” de les midíes de política llingüística anunciaes pola Conseyera d’Educación y Cultura

by asturnet

Esti martes pasáu, la conseyera Ana González, adelantó lo que van ser les sos llinies polítiques d’actuación no que queda de llexislatura. Y, no referente a la política llingüística y enseñanza, dependiente del so departamentu, la Xunta pola Defensa de la Llingua Asturiana (XDLA) denuncia que “nun pudieron ser más inconcretes les sos afirmaciones”, yá que según esta organización de reivindicación llingüística “en cuanto a política llingüística, solo fizo referencies a una supuesta promoción del usu del asturianu per parte de l’Alministración y al posible cambiu d’estructura na celebración de la Selmana de les Lletres”.

Dos anuncios que dende la XDLA consideren “de lo más secundario y con un grau d’ellaboración, ciertamente, pa llamentar”. Pa la Xunta “ye d’esperar que los nuestros representantes públicos, se presenten nes instituciones representatives a contar realmente lo que van facer y non a facer un corta-apega de los sos mediocres programes políticos”. La XDLA espera tamién que “les polítiques que se van desarrollar tengan como un mínimu imprescindible’l cumplimientu de la llexislación vixente na materia, y nun supongan, per elles mesmes, una rebaxa constante de los derechos que la ciudadanía yá tien reconocíos”.

Sicasí, denuncien que “tolo anterior nun foi lo peor y más grave”, pa la organización asturiana “lo realmente plasmante foi la absoluta falta de referencies a la situación de la enseñanza del asturianu nel sistema educativu”, yá que “nada se dixo de la creación de la Especialidá de Llingua Asturiana pal profesoráu y, tovía más, nada se dixo del cumplimientu de les sentencies d’abolición de la ratio que gobiernos anteriores insistieron en vulnerar”. Recuerden dende la Xunta pola Defensa de la Llingua Asturiana que “agora ye obligación el recordar a tolos centros educativos d’Asturies que tienen qu’ufiertar la asignatura a toles persones que lo soliciten”.

“Por eso –espliquen dende la Xunta pola Defensa de la Llingua Asturiana (XDLA)-, instamos a la Conseyería y a la Dirección Xeneral de Política Llíngüistica a preparar unes actuaciones sistemátiques de normalización que nun reduzan el so llabor a simples declaraciones d’intenciones y al sordu continuismu burocráticu”.

Tamién te podria gustar