La XDLA convoca a manifestase esti xueves a les 17 na Xunta Xeneral

La XDLA convoca a manifestase esti xueves a les 17 na Xunta Xeneral
24 febreru 12:02 2016 Imprimir

Iniciativa pol Asturianu y dellos otros coleutivos civiles van participar na concentración d’esti xueves 25 contra la prohibición del asturianu na Xunta Xeneral que convocara hai poco la Xunta pola Defensa de la Llingua Asturiana pa reclamar dignidá pa la llingua asturiana dempués del ataque nel parllamentu.

Nuna nota de prensa asoleyada esti miércoles, Iniciativa pol Asturianu quier declarar el so sofitu a la concentración convocada pola Xunta pola Defensa de la Llingua Asturiana pa esti xueves 25 a les 17 hores a les puertes de la Xunta Xeneral d’Asturies, n’Uviéu, xuniéndose a otros coleutivos que ya anunciaren de manera informal la so presencia.

La organización va participar de la concentración animando a tolos sos socios y a tola sociedá asturiana a sumase a esti actu reivindicativu “que vien a amosar el descontentu ciudadanu coles declaraciones contra l’asturianu de Mercerdes Fernández, presidenta del PP d’Asturies, asina como cola decisión apoyada pola FSA-PSOE, Foro y C’s, pa prohibir l’usu del asturianu nel parllamentu”.

La concentración ye una amuesa más del descontentu social que xeneró esta decisión y que sumó yá cuasi 3.000 firmes contraries “na convocatoria abierta contra ella por Iniciativa pol Asturianu va una selmana en Change.org, amás d’una montonera de crítiques nes redes sociales y n’especial nel tuit de Mercedes Fernández (@cherines_pp) nel que celebraba la consecución de la prohibición”.

Loading Facebook Comments ...