Portada Comunicación La XDLA califica d’insuficiente l’alcuerdu d’investidura ente la FSA ya IX

La XDLA califica d’insuficiente l’alcuerdu d’investidura ente la FSA ya IX

by redacción asturnews

La Xunta pola defensa de la Llingua Asturiana vieno acabante calificar de “claramente insuficiente” l’alcuerdu d’investidura ente la FSA y IX en materia llingüística, nuna nota de prensa asoleyada esti xueves na que de la mesma señala tamién que les propuestes de Podemos Asturies nun suponen un avance mayor que l’alcuerdu algamáu ente les otres dos formaciones.

La Xunta pola Defensa de la Llingua Asturiana (XDLA) quier mostrar “la so esmolición fonda pol alcuerdu d’investidura algamáu ente la FSA y IX tocante a la llingua asturiana,qu’hai que calificar de claramente insuficiente. Les dos fuercies polítiques nin se lleguen a comprometer cola oficialidá y namás falen de buscar los apoyos necesarios p’algamar una reforma del Estatutu d’Autonomía que permita establecer esti marcu llegal. Nun s’entiende por que la cuestión llingüística ye l’únicu puntu onde s’establez que depende de terceros. Pa tolo demás nun se fala de la necesidá d’una mayoría parllamentaria o de tener una partida presupuestaria…”

Amás, como vien denunciando nes últimes feches esta asociación de defensa del idioma, “manca enforma que se refiera al gallego-asturianu, términu usáu pola llexislación asturiana y en consecuencia pol Gobiernu, como ‘fala’ y ‘eo-naviego’, apartándose asina de la práctica de l’Alministración nestos últimos trenta años y desoyendo al movimientu de reivindicación llingüística de la zona. Aparte, la pretensión de llindar la oficialidá del gallego-asturianu a los conceyos onde se fala ye afondar en qu’hai llingües y falantes de primera y de segunda. Insistimos na necesidá d’un tratu igualitariu pa esti patrimoniu llingüísticu: que tanto asturianu como gallego-asturianu sían oficiales y que depués una llei de la Xunta Xeneral fixe les zones d’usu predominante de cada llingua”.

Per otru llau, amás de la busca de terceros que se sumen al apoyu a la oficialidá, “viéndennos como novedá una llei pal usu de la toponimia. Depués de 15 años desque principió’l procesu de recuperación de la toponimia, dícennos que quieren una llei p’aplicar lo que yá diz la Llei d’Usu, que lleven años ensin desarrollar…”

Mención aparte ye que l’alcuerdu d’investidura “nun fala de la presencia del asturianu en RTPA y la necesidá d’aprobar l’alcuerdo-marcu onde s’estableza’l so papel dientro del procesu de normalización llingüística, del usu tresversal de la llingua propia en toles estayes de la Alministración autonómica, d’esparder la ufierta del Plan Pilotu del Asturianu per toles escueles, del apoyu a la industria cultural o del encaxe y la tresversalidá de les competencies de Política Llingüística dientro del organigrama del Gobiernu, que bien podría pasar a ser una Viceconseyería con delles direcciones xenerales”.

Por too esto, dende la XDLA piden a les dos fuercies polítiques y a Podemos Asturies “un apoyu decidíu cola oficialidá del asturianu ensin más añedíos, respetu a los falantes de gallego-asturianu y un compromisu tresversal cola normalización llingüística. Un compromisu que s’ha espeyar al traviés de midíes concretes y ambicioses, non a la espera de lo que vaigan votar terceros”.

Tamién te podria gustar