Portada Comunicación La XDLA califica de “llamentables” les burlles del presidente de la FADE al asturianu

La XDLA califica de “llamentables” les burlles del presidente de la FADE al asturianu

by redacción asturnews
Concentración de la XDLA na Delegación del Gobiernu cola "Pita"

La Xunta pola Defensa de la Llingua (XDLA) vieno acabante de calificar esti día de “llamentables” les burlles del presidente de la FADE al asturianu feches el llunes nuna inauguración na so empresa nes que punxo en dulda la posibilidá de les empreses de producir nun contestu nel que se declarare la oficialidá.

La XDLA recurría esti día a los manuales de Sociollingüística usen exemplos pa esplicar “conceptos como l’autoodiu, el sentimientu d’inferioridá llingüística, el clasismu nel usu social de les llingües, etc” qu’aplicaba ensin duldes a les declaraciones del presidente de la FADE, Belarmino Feito. La Xunta pola Defensa de la Llingua Asturiana (XDLA) proponía al tiempu “a futuros autores o al profesoráu d’esta materia que nun vaigan más allá a buscar exemplos. Les declaraciones de Belarmino Feito, presidente de la Federación Asturiana d’Empresarios (FADE), qu’aprovechó la presentación d’un telescopiu fabricáu na so empresa, Asturfeito, pa burllase del asturianu y avisar a los partíos políticos de les consecuencies presupuestaries de la oficialidá, resumen en mui poques palabres tol repertoriu de prexuicios contra les llingües minorizaes”.

La XDLA tien bien afitao que se ta reproduciendo lo qu’allá pelos años 80 del sieglu pasáu, la “bona sociedá” d’Asturies con trés y cuatro apellíos movilizóse nuna campaña conocida depués como la de los “Sensatos y pensantes”. Avisaben a los responsables políticos del peligru de que la recuperación del asturianu tuviere éxitu. Y tien bien nidio tamién que “aquel movimientu intolerante de sectores minoritarios, pero influyentes pol so estatus económicu, profesional y social, buscaba negar les aspiraciones democrátiques de los falantes de la llingua del pueblu, esa llingua que falaben los que-yos llimpiaben les cases o trabayaben nes sos fábriques”.

Por eso camienta que “agora, empezando’l siegu XXI, cuando les llibertaes ciudadanes s’enanchen y la petición d’oficialidá reclama reconocer derechos y poner los medios pa que’l patrimoniu llingüísticu d’Asturies pueda sobrevivir, tenemos qu’asistir a una reedición del clixé: les fuercies vives avisando de los peligros del apocalipsis y echando mano d’un tópicu que se pue resumir en “nin un duru pal bable mentes haya fame nel mundu”. Evidentemente, ye un argumentu que se pue aplicar a cualquier gastu del presupuestu autonómicu (incluyíes les partíes marafundiaes pa cursos de la FADE), pero, casualmente, namás se saca cuando se trata de falar de presupuestos pa la recuperación del asturianu”.

Lo más llamentable pala asociación de defensa del idioma ye qu’eses declaraciones “vengan d’una persona que se diz arguyosa de les sos raíces somedanes. Nun nos estraña. Esi ye otru tópicu del autoodiu: soi de pueblu, pero ríome de lo que fala la mio xente. Cuesta figurase al presidente de la patronal vasca, o gallega, o catalana, faciendo declaraciones pa facer risión de la llingua de la so comunidá. La suerte ye qu’esa clas d’actitúes yá nun son les que predominen na sociedá asturiana. Tán tovía mui enraigonaes en dellos sectores influyentes, sí, pero les coses van cambiando. Los prexuicios, el clasismu, el sentimientu d’inferioridá… son actitúes que van desapaeciendo cola formación y la educación. L’Asturies arguyosa del so patrimoniu que se manifestó estes últimes selmanes reclamando derechos y futuru ye’l meyor exemplu d’esa sociedá abierta y democrática que quier reconocer derechos y non negalos”.

Tamién te podria gustar