La Vuelta escaez la toponimia

La carrera ciclista más importante d’España, La Vuelta, escaez otru añu la toponimia de nueso y so pasu peles carreteres asturianes nun va sirvir d’escaparate a la realidá cultural y llingüística d’Asturies, ensin que’l Gobiernu seya a facer cumplir la llei per elli impulsada de normalización toponímica nos conceyos d’Asturies. Mentantu que los topónimos oficiales n’eusquera y gallegu sedrán respetaos, nel casu asturianu castellanizaránse otra vuelta.

La noticia xurdía na presentación nel Muséu de la Minería de L’Entregu de les dos etapes que van celebrase n’Asturies nesta edición. Y nel actu, nel que participaben Ana González, conseyera d’Educación, Cultural y Deporte, y Graciano Torre, conseyeru d’Economía y Emplegu, ente otres autoridaes, nun se faló de la cuestión. Les etapes de La Vuelta que siguen escaeciendo’l respetu polos nomes de llugar asturanos son ‘Oviedo-Lagos de Covadonga’ (7 de setiembre) y ‘San Martín del Rey Aurelio-La Farrapona. Lago de Somiedo’ (8 de setiembre), dos finales d’etapa que son enforma nomaes y tienen abonda audiencia a nivel mundial.