La vuelta a clas sigue nel aire y ha programase esta selmana

La vuelta a clas sigue nel aire y ha programase esta selmana
18 mayu 08:46 2020 Imprimir

Los equipos directivos de los centros educativos van tener de decidir qué docentes s’incorporen en función del númberu d’alumnos y qué espacios s’utilizarán, qu’entraes, salíes y recreos gradiaos y col contactu mínimu ente persones van desenvolver, lo que según los sindicatos nin ye nin pue ser la so función.

Anque sigue habiendo munches duldes, adulces va clarificándose cómo pue ser la reincorporación a les aules, a finales de mes (o más palantre si la conseyería afita otra fecha) pa esos 7.500 mozos asturianos que van tener oportunidá de volver. Nun van ser toos porque la vuelta ye voluntaria. Y de’l númberu d’alumnos que torne a cada centru van depender munches coses de les que tien qu’entamar l’equipu directivu. Porque nes sos manos dexa Educación la decisión sobro qué instalaciones del centru van usase (aules, baños, biblioteca, espacios comunes…) y el númberu de docentes que tienen de volver.

La conseyería unvió esta selmana pasada a los sindicatos el borrador del documentu que regula estes cuestiones y que van empezar a axustar güei llunes. Según ésti, el día 18 tienen de volver equipos directivos, profesores de segundu de Bachilleratu, tutores de cuartu d’ESO, profesoráu d’enseñances profesionales p’atender los módulos de proyectu, profesoráu que forme parte de tribunales y comisiones de les pruebes d’accesu a les distintes enseñances y los orientadores pa les evaluaciones sicopedagóxiques. A partir d’ende, el directores pueden ordenar una incorporación gradiada. «L’oxetivu d’esta fase ye l’atención prioritaria del alumnáu más vulnerable por aciu tutoríes presenciales», diz el documentu.

Tamién depende de los equipos directivos informar a docentes y families de la fecha y les condiciones d’incorporación a l’actividá presencial, de les midíes de protección y de les midíes organizatives y d’usu de los espacios. Muncha responsabilidá en manos del equipu directivu. CC OO alvertía ayeri de qu’esi personal nun tien la formación afayadiza pa estes decisiones y SUATEA xuníase a esa mesma opinión. De fechu, los sindicatos notres Comunidaes ya amenazaren con convocar fuelga nel sector.

Lo que ta claro pala Conseyería ye que se debe embrivir el contactu ente les persones, garantizar la distancia de seguridá, reorganizar horarios… Darréu d’ello, ha diseñase la circulación nos espacios, les entraes y salíes de too el personal y «recreos del alumnáu de forma gradiada con oxetu d’embrivir les aglomeraciones». Si ye posible, «va entamar al alumnáu en bloques estremaos pa embrivir y contactu ente ellos». Va Haber que faer grupos y veces rotatories.

Y cuando inda nun s’acabó d’entamar esti final de cursu yá ha entamase a faer lo propio col siguiente. Ministeriu d’Educación y comunidaes van formar un equipu de trabayu que va diseñar la vuelta en septiembre con trés posibles escenarios: un regresu normal, unu con distancies de seguridá y el postreru, con una enseñanza ‘online’ prevista pa tar preparaos ante la posibilidá de nuevos confinamientos.

  Categories: