La VIII Primavera Barroca aporta en marzu

La VIII Primavera Barroca aporta en marzu
14 febreru 09:00 2021 Imprimir

Vuelve la música barroca a Uviéu con un programa que va entamar el 9 de marzu y va estendese hasta’l 26 de mayu y que por octavu añu lleva’l nomatu de Primavera Barroca.

El conceyal d’Infraestructures y primer Teniente d’Alcalde, Nachu Cuesta, en nome del edil y presidente de la Fundación Municipal de Cultura, José Luis Costillas; el director del Centru Nacional d’Espardimientu Musical (CNDM), Francisco Lorenzo y el director artísticu del ciclu, Cosme Marina, presentaron esta selmana pasada, nel Auditoriu, la VIII edición del ciclu Primavera Barroca.

El ciclu, que se va celebrar nel mesmu equipamientu municipal, va empezar el 9 de marzu y va estendese hasta’l 26 de mayu. Les localidaes pa los seis conciertos del programa salen mañana, sábadu día 13, a la vienta en www.entradas.oviedo.es a un preciu únicu de 15 euros. Pa Cuesta “l’apueste del Conceyu y de la Fundación Municipal de Cultura por esti ciclu y pola llírica ye clara. Ye un trabayu de munchos años que rique una complicidá importante ente el organizadores y el públicu, una ayalga que debemos de caltener y amontar. Tenemos que ser capaces de treslladalo a xeneraciones futures”.

Francisco Lorenzo, director del CNDM, esplicó que “anguaño vamos entamar 288 actividaes en 28 ciudaes españoles de 12 comunidaes, ente elles esti ciclu integráu na programación del CNDM al traviés del programa Circuitos”. La edición d’anguaño adquier una importancia especial tantu pal Conceyu, al traviés de la Fundación Municipal de Cultura, como pal CNDM que na pasada edición de Primavera Barroca solo pudo llevase a cabu’l primeru de los seis conciertos programaos, teniendo que ser suspendíos el restu por causa del estáu d’alarma declaráu pola covid-19”, sorrayó’l responsable del CNDM.
Cosme Marina, director artísticu del ciclu, especificó’l conteníu del programa, que va arrincar  el 9 de marzu, con Il Gardellino, “agrupación fundada en 1988 pol so director, Marcel Ponseele, unu de los oboístas de mayor prestíu internacional”. Esti grupu flamencu convirtióse, de magar, n’una de les grandes referencies na interpretación barroca europea. La so propuesta axunta a autores como Johann David Heinichen, Johann Adolph Hasse, Jan Dismas Zelenka, Georg Philipp Telemann, Antonio Vivaldi o Johann Georg Pisendel. Esti conciertu inscríbese, de la mesma, nun proyectu tresversal del CNDM, CortedeDresde, qu’ufierta en 8 conciertos de distintos ciclos a lo llargo de tola temporada una panorámica de la música creada pa esta Corte, unu de los centros más influyentes y prestixosos de too el sieglu XVIII.

La segunda gran cita va tener llugar el 25 de marzu col conxuntu madrilanu L’Apothéose, fundáu en 2015 y consolidáu como una de los apuestes más coraxosos y de mayor interés nel panorama de la música histórica. Esta nueva agrupación va ufiertar un monográficu camerístico dedicáu a George Frideric Haendel, un compositor más conocíu polos sos grandes creación llíriques y corales, pero que nun dexó de cultivar la música de cámara mientres tola so vida. Si n’otres ediciones el “Haendel operísticu” tomó mayor protagonismu, nesti casu facer la presea con “A tribute to tears”, programa nel que podrán escuchase seis sonates del compositor alemán.

El 14 d’abril el públicu rexuntáu nel Auditoriu Príncipe Felipe va poder escuchar a unu de los nomes más aclamaos de la música historicista española, Emilio Moreno, con La Real Cámara, nun conciertu que’l so exa principal ye la integración de la música de Giuseppe Torelli cola de Francisco José de Castro, xesuita sevillanu que vivió en Brescia dedicáu a diverses ocupaciones intelectuales, ente elles la música, y yera conocíu en tierres italianes como ‘Spagnuolo’. Emilio Moreno afondó como nengún otru violinista actual na obra d’esti músicu y va ufiertar una selección de les sos composiciones nel so conciertu con La Real Cámara.

“Ars lacrimae” ye l’evocador títulu col que Enrike Solinís, por aciu el laúd y la guitarra barroca, va proponer un fascinante viaxe al traviés de la obra d’autores como John Johnson, John Dowland, Alonso de Mudarra, Luis de Narváez, los manuscritos Barbarino y Osborn o’l mesmu Johann Sebastian Bach. Un percorríu al traviés de dos sieglos -XVI y XVII- empuestos por unu de los meyores músicos españoles nel ámbitu de la guitarra barroca y que nos dexará conocer en tola so guapura ya intensidá la evolución de dambos preseos a lo llargo del tiempu. La cita ye’l 29 d’abril.

El 10 de mayu’l públicu va poder conocer el nuevu trabayu del director Dani Espasa frente al so conxuntu Vespres d’Arnadí. Un proyectu que va cuntar con una solista de luxu, Vivica Genaux y que nos treslladará de nuevu a la CortedeDresde al traviés de partitures de compositores como Johann Adolph Hasse y títulos como Cleofide, Solimano o Numa Pompilio. El virtuosismu de Vivica Genaux, una de les más grandes mezzosopranos internacionales, va alternar con diverses obres instrumentales nun programa que supón una ocasión única p’averase a un repertoriu estraordinariu y poco habitual nes sales de conciertos.

La Primavera Barroca va cerrase a lo grande el 26 de mayu cola formación asturiana Forma Antiqva, consolidada yá como una de les más aplaudíes formaciones nel campu de la música antigua del nuesu país. Con una continua y creciente presencia internacional y una cuidada selección de grabaciones discográfiques, el grupu que lidera Aarón Zapico va llevanos a un bien especial “xardín barrocu” coles composiciones d’autores como G.F. Haendel, Giles Farnaby, John Blow, Henry Purcell, Antonio de Literes o Gaspar Sanz, ente otros. Con esti arrogante programa va ponese broche d’oru a esta nueva y especialmente emocionante edición de Primavera Barroca”.
Al pie de esti programa musical, va celebrase un ciclu de charres online entamáu pol CNDM en collaboración cola Universidá d’Uviéu y el Conservatorio Superior de Música del Principáu d’Asturies. Nestos alcuentros, el catedráticu de musicoloxía de la Universidá d’Uviéu, Ramón Sobrín, va falar colos músicos ya intérpretes que participen nel ciclu, afondando sobro’l  repertoriu y el conteníu de los sos respectivos conciertos: L’Apothéose (25 de marzu), Emilio Moreno (14 d’abril), Enrike Solinís (29 d’abril) y Dani Espasa (10 de mayu). Estos alcuentros van emitir por streaming en directu antes de la celebración de los respectivos conciertos al traviés de la canal de YouTube de la Universidá d’Uviéu y van tar disponibles darréu na canal del CNDM.

La Fundación Municipal de Cultura y el  quieren animar al públicu a esfrutar de tolos conciertos que componen “Primavera Barroca” nel Auditoriu Príncipe Felipe y sorrayar qu’esta sala ta convenientemente afecha a toles midíes preceptives p’apurrir una esperiencia de cultura segura”. El preciu únicu pa les localidaes de tolos conciertos del ciclu ye de 15 euros y van tar disponibles a partir de mañana, día 13 de febreru. Pueden adquirise al traviés de les siguientes canales: taquilles del Teatru Campoamor n’horariu de 11h a 14h y de 17h a 20h y preferentemente online al traviés de la páxina www.entradasoviedo.es..

  Categories: