La VI Esposición Internacional d’Arte Postal d’Avilés escueye a Carmen Peláez

La VI Esposición Internacional d’Arte Postal d’Avilés escueye a Carmen Peláez
18 xineru 10:44 2022 Imprimir

La VI Esposición Internacional d’Arte Postal d’Avilés escueye como ganadora una obra de Carmen Peláez. La obra de l’artista afincada n’Avilés, que representa a l’ave conocida como mariagarcía o llavandera suspendida nel aire, foi escoyida per Correos, ente les 500 presentaes, pa convertise en sellu.

La VI Esposición Internacional d’Arte Postal d’Avilés, que se clausura esti llunes, escoyó como pieza más representativa, d’ente les 500 presentaes llegaes de too el mundu, una obra de la pintora avilesina Carmen Peláez. El premiu va ser convertila nun sellu de correos dedicáu al Mail Art.

L’amuesa, que la so temática d’esta edición yera “l’aire”, clausurose esti llunes 17 de xineru nel Palaciu de Valdecarzana. Recoyó propuestes creatives multidisciplinares dedicaes al Arte per Corréu, llegaes  de 42 países y estaos distintos, y esta mañana cuntó cola visita de Yolanda Alonso, concejala de Cultura d’Avilés, acompañando a Carmen Peláez.

La obra escoyida per CORREOS y creada por Peláez reflexa una “mariagarcía”, como se conoz a les populares llavanderes (Motacilla alba) n’Asturies, suspendida nel aire buscando dormidero. Un ave d’aspeutu fráxil, con tonos blancos, negros y grises y con llarga cola en continuu valumbu, especie común en zones rurales y urbanes asturianes.

Cola so elección, la sociedá estatal da continuidá a seriar “Pintura”, lema “mail art”, empecipiada en 2020, cola diferencia que nesta ocasión el nuevu sellu emitíu va tener calter internacional (Tarifa C), que la entidá va circular na próxima edición d’Arte Postal n’Avilés, nesti 2022.

L’autora reconoz la so inspiración nes alcordances de la so niñez, cuando reparaba a estes inquietes aves saltando ente los charcos d’agua, llamándo-y l’atención la so fraxilidá y la so resistencia a condiciones climátiques dures.

Nes sos propies palabres, esplica qu’ella “creía que l’orixe del so nome o llamatu ‘llavandera’, procedía por ser pajarinos trabayadores, pulcros y que s’asemeyaben a les madres nel llavaderu. La ‘mariagarcía’ ye un animal delicáu y poco llamativu que nun ye fácil reparar en plenu vuelu, lo que m’obligó a tar pindiu d’esi momentu crucial; pero cuando vuela, especialmente pel hibiernu, mueve l’aire, un aire fresco y llimpio que quixi simbolizar, y al que creo, toos tendríamos de curiar”.

Per otru llau, CORREOS va llanzar una tarxeta enteru postal ilustrada con otra de les obres presentaes, buscando una reconocencia escontra tolos mailartistas qu’utilizaron el Mail Art pa espresar les sos idees nesta nueva amuesa, que convierte cada añu a Avilés nun referente mundial d’esta particular variante artística.

Dempués de la clausura de la VI Esposición Internacional d’Arte Postal n’Avilés, col lema “l’aire”, un total de 50 obres de postales van recalar nel Muséu Postal y Telegráfico que CORREOS tien en Madrid, onde van formar parte d’una esposición permanente, y sumándose a les escoyíes de la pasada edición, ampliando con ello esti novedosu fondu dedicáu al arte per corréu pal esfrute de visitantes.

  Categories: