La V Esposición d’Arte Postal d’Avilés supera cifres con más de 500 obres de 32 países

La V Esposición d’Arte Postal d’Avilés supera cifres con más de 500 obres de 32 países
23 avientu 14:29 2020 Imprimir

La V Esposición Internacional d’Arte Postal d’Avilés, dedicada nesta edición a la tierra, consolida a Avilés como la principal referencia d’España nel movimientu internacional d’espresión artística mail art. Esta edición, dedicada al elementu esencial “tierra”, recibió más de 500 obres procedentes d’artistes de 32 países, colo que supera un añu más toles cifres de les ediciones anteriores.

Esta iniciativa de la conceyalía de Cultura d’Avilés, cola collaboración de la Sociedá Estatal Correos, foi inaugurada de forma oficial por Yolanda Alonso, conceyala de Cultura, esti vienres 18 d’avientu, a les 18 hores na sala d’esposiciones del Palaciu de Valdecarzana y va Permanecer n’exhibición, de forma gratuita, hasta’l 15 de xineru de 2021.

La constante cooperación ente Correos y la conceyalía de Cultura va cristalizar na edición d’un sellu en 2021 dedicáu al arte postal, pa lo cual, va escoyese xuna d’ente les 500 postales artístiques recibíes y que constitúin la esposición. Tou un finxu, cuidao que se trata del primer sellu circuláu nel mundu sobro’l mail art, y protagonizáu dende Avilés.

Coles mesmes, una selección de les obres postales espuestes n’Avilés va treslladar al Muséu Postal y Telegráfico que Correos tien en Madrid, y ellí va ser amosada al públicu xuntu al restu de conteníos d’esti espaciu.

La V Esposición Internacional d’Arte Postal n’Avilés constitúi una esperiencia poliédrica de respuestes creatives ya idees orixinales desenvueltes sol discursu de la llibertá, sobro soportes tan singulares como corteces d’árboles, plásticos y acetatos, papeles de too tipu, cartones, madera, cerámica, teles y urdimbres, materiales orgánicos, elementos reciclaos, borrafes urbanes…

Munches de les obres recibíes vienen de la comunidá educativa local, nacional y estranxera. Ente les asturianes, el IES Menéndez Pidal, La Factoría Cultural, el CAI Villalegre, la Escuela d’Artes Oficios d’Avilés y la Fundación Vinjoy. Ente les nacionales, la Corporación Semiótica Galega y l’Escuela de Cerámica Alfar Arias, de Puertollano. Y dende Turquía, les universidaes de Trakya, Namik Kemal y Kafkas.

Podrán almirase dende un planeta tierra llorando de murnia, de la moza ecuatoriana Dalexis Triana; a un reló de tierra qu’apura frenar la devastación de los ecosistemes, de la Corporación Semiótica Galega (COSEGA); la tarxeta del alemán Lorenz Mueller qu’apremia a un entendimientu ente la humanidá y el planeta, o tierra física, orixinaria de Perú, embolsada por Víctor Valqui. Creaciones qu’acentúen lo térreo de la convocatoria.

L’horariu de visita, gratuita, ye de llunes a vienres de 11 a 14 y de 18 a 21 hores. La V Esposición Internacional d’Arte Postal d’Avilés va permanecer n’exhibición hasta’l 15 de xineru de 2021.

L’accesu a la sala d’esposiciones del Palaciu de Valdecarzana cuenta con toles midíes de protección sanitaria frente a la pandemia del COVID-19.

  Categories: