La Universidá ve sesgáu l’informe que deniega a Xixón el nuevu grau d’Inxeniería

La Universidá ve sesgáu l’informe que deniega a Xixón el nuevu grau d’Inxeniería
12 xineru 14:04 2018 Imprimir

La Universidá ve sesgáu l’informe de la Conseyería d’Educación que deniega a Xixón el nuevu grau d’Inxeniería y va puxar por tornar la decisión.

La Universidá d’Uviéu yá treslladó a la Conseyería d’Educación los sos allegamientos dempués de que’l departamentu que dirixe Genaro Alonso manifestárase en contra de la implantación del grau d’Inxeniería d’Organización Industrial na Escuela Politécnica d’Inxeniería de Xixón (EPI).

La institución académica ufierta una docena d’argumentos pa defender la puesta en marcha d’una carrera bien demandada polos empresarios de la rexón. El principal de toos ellos ye’l que fai referencia a la demanda d’esti títulu. La conseyería señaló que, basándose nos mesmos datos que-y unviara’l Vicerrectoraáu d’Estudiantes, solo 27 alumnos empecipiaren esta titulación fora d’Asturies nos postreros seis cursos, una demanda «escasa» pa ser aprobáu.

Nel documentu d’allegamientos la Universidá noma de «simple y sesgáu» l’analís d’Educación nesti sentíu. Porque, diz, “solo considera’l númberu d’estudiantes asturianos que deciden cursar esta titulación fora del Principáu, ensin analizar otros parámetros, como’l númberu d’alumnos de provincies a les que salen o los que cursen esta titulación nes universidaes nes que ta enllantada, por citar dalgunu de los munchos omitíos”.

Pero, amás, rectifica les cifres que, según Educación, fuéren-y unviaes dende la institución académica. «Los datos de treslláu d’estudiantes que s’incluyeron nel escritu y que fueron tomaos como base para analizar la demanda social del títulu nun se correspuenden esactamente colos facilitaos pol Vicerrectorado d’Estudiantes, pos xuben a 51 nel periodu analizáu», el tiempu entendíu ente los cursos 2011-2012 y 2016-2017. Amiesta, amás, que «la demanda d’esta titulación algamaba un númberu d’estudiantes que suponía’l 14% de los alumnos de la caña industrial de la Universidá d’Uviéu, lo qu’alzaría la cifra a 88 places», que ye la media que vien recoyida nel llibru blancu de l’Axencia Nacional d’Evaluación de la Calidá y Acreditación (ANECA) sobro esta titulación concreta. La Universidá aportuna en que sí xustificó’l númberu esperáu d’estudiantes, qu’afita finamente en sesenta, según les prospecciones sobro la so evolución.

A lo último, la Universidá entiende qu’hai partes del informe que tomen “como una invasión nes sos competencies académiques”, anque manifiesta “la so disposición al diálogu y a esclariar cuanto sía precisu p’ameyorar la propuesta atendiendo a los encamientos d’Educación”.

  Categories: