La Universidá va revisar a la baxa’l costu d’asumir el grau d’Educación Física

La Universidá va revisar a la baxa’l costu d’asumir el grau d’Educación Física
26 xineru 09:15 2018 Imprimir

Va Haber un replantegamientu del estudiu de los costos derivaos d’enllantar na Universidá d’Uviéu’l grau de Ciencies de l’Actividá Física y el Deporte según apautó esti dia la Comisión d’Evaluación del Grau.

El rector, Santiago García Granda, aseguraba la selmana pasada que la propuesta de la Facultá de Formación del Profesoráu y Educación rondaría los siete o ocho millones frente al millón d’euros que costaría poner en marcha esta titulación de la mano del centru asociáu Padre Ossó. Polo abuitao de la cifra, les declaraciones de García Granda causaron plasmu ya incredulidá na facultá de Llamaquique. Sobremanera porque los impulsores del grau defenden qu’el so planteamientu sería más que vidable con una partida non cimera al mediu millón d’euros.

Asina se punxo de manifiestu na segunda xunta que caltuvieron esta selmana los miembros de la comisión d’evaluación del grau, integrada polos directores de los dolce departamentos implicaos y el vicerrector d’Organización Académica y los sos directores d’área. En dichu alcuentru aportunose en que la docencia del nuevu títulu nun va riquir la construcción de nengún edificiu nuevu p’allugar aules, despachos o llaboratorios una y bones la idea ye aprovechar los espacios esistentes na actualidá en cualesquier de los campus. El gastu, por tanto, quedaría acutáu a les necesaries contrataciones de nuevu profesoráu.

Mientres la comisión alcordó siguir trabayando nuna propuesta vidable a partir d’eses premises, l’alderique sobro l’allugamientu más conveniente pa los estudios de Ciencies de l’Actividá Física y el Deporte volvió colase nel discursu políticu de los Conceyos que, hasta la fecha, amosaron el so interés n’acoyelos.

En Mieres, a que’l so campus llevaría la docencia’l centru asociáu Padre Ossó, hubo esta selmana unanimidá de tolos grupos municipales. Izquierda Xunida -nel gobiernu-, PSOE, Partíu Popular y Somos sofitaron ensin fisuras una declaración institucional en defensa de la implantación del grau nel campus de Barredo. Ente los argumentos espuestos señálase que’l complexu docente «tien de xugar un destacáu papel a lo llargo de les próximes décades». Ye más, la Corporación considerar como elementu estratéxicu pal desenvolvimientu económico y social del conceyu.

N’Uviéu, foi’l voceru municipal del PP, Agustín Iglesias Caunedo, quien s’encargó de recordar qu’el so grupu “yá presentó nel Plenu del Conceyu delles vegaes qu’Uviéu tien d’asitiase como see pal grau de Ciencies del Deporte” porque, “como conceyales, tenemos de tratar de llograr les mayores posibilidaes de desenvolvimientu económicu pa les nueses ciudaes”

Xixón ye otra de les ciudaes en tema nesta cuestión. L’equipu de gobiernu, en manos de Foru, yá avanzó la so intención de presentar a la Universidá’l próximu mes una propuesta formal por que los estudios d’Educación Física acaben nel so campus. Tamién Avilés defendió en delles ocasiones qu’esos estudios tienen de dir a la ciudá del Adelantráu.

  Categories: