La Universidá va destinar 16 millones en 4 años a meyorar instalaciones

La Universidá va destinar 16 millones en 4 años a meyorar instalaciones
19 marzu 09:50 2019 Imprimir

El Conseyu Social de la Universidá d’Uviéu dio ayeri’l vistu bonu al plan d’inversiones previstu pola institución académica pa los cuatro próximos años col que #Uniovi va destinar 16 millones ea meyorar instalaciones.

Nesi periodu pretende acometese una serie d’obres de caltenimientu y rehabilitación d’edificios, nel so mayor parte facultaes y escueles de los distintos campus, anque tamién tán previstes obres nel colexu mayor San Gregorio, n’Uviéu. El presupuestu total destináu a esti plan ronda los 16 millones d’euros.

Recóyense nél, por casu, obres p’ameyorar l’accesibilidá de la facultá de Medicina, el primer edificiu de la Universidá llevantáu nel campus del Cristu y que, casi cincuenta años dempués de la so inauguración, evidencia carencia pal accesu de persones con movilidá amenorgada. Les facultaes d’Economía y Empresa, Químiques y Xeolóxiques van ser otros de los centros académicos nos que se van llevar a cabo trabayos de meyora nos próximos cuatro años. Contémplense, ente otres, obres nes cubiertes y la renovación del actual sistema de calefacción  coles mires d’ameyorar la eficiencia enerxética nes instalaciones.

La xunta del Conseyu Social de la Universidá de la selmana pasada tamién sirvió p’aprobar el cambéu de les memories de verificación de delles titulaciones. En concretu, de seis estudios de grau y cuatro de máster. Amás de la estinción de dos másteres Erasmus Mundus y la so nueva creación cola entrada de nueves universidaes. Tamién se dio’l vistu bonu a la fundación del Institutu Universitariu de Ciencies y Tecnoloxíes Espaciales d’Asturies (ICTEA), que’l Conseyu de Gobiernu de la institución académica aprobara’l pasáu día 1.

  Categories: