La Universidá trabaya nun plan pa remocicar la plantiya

La Universidá trabaya nun plan pa remocicar la plantiya
16 mayu 11:01 2019 Imprimir

El rector de la Universidá d’Uviéu, Santiago García Granda, anunció esta selmana nel Conseyu Rectoral celebráu nel IES Elisa y Luis Villamil d’A Veiga que la nueva convocatoria de places, que calificó de «bien amplia», contempla un plan de remocicamientu de la plantiya.

Van Ser, según García Granda, más d’un centenar de places de profesoráu nuevu y un porcentaxe bien altu d’ayudantes de doctoráu. «Anguaño batemos récord desque tamos nel equipu rectoral», apuntó’l rector.

Con esti plan, según indicó García Granda,  quier evitase la contratación de profesoráu asociáu, «que tien unos contratos precarios», y favorecer que’l profesoráu faiga «tola carrera académica dende’l principiu». Tamién se van realizar contratos predoctorales pa quien tán faciendo la tesis neses árees onde esiste un avieyamientu mayor.

Asina, «dientro de les dificultaes económiques que tien la institución, intentamos dir anovando la plantiya y remocicándola, que ye una necesidá que tenemos», reconoció’l rector. La media d’edá del profesoráu de la Universidá asturiana asitiase nos 55 años. «Tenemos munches persones mayores. Vamos anovando, pero precisamos meter xente nuevo», asumió Santiago García Granda.

El Conseyu Rectoral celebrose esta vegada nel centru educativu vegadense dientro del programa Foro Comunicación y Escuela. El so coordinador, Luis Felipe Fernández, treslladó al máximu órganu de xestión de la institución académica la posibilidá d’estrechar llazos de collaboración apostando, ente otres propuestes, por retomar los cursos d’estensión universitaria na contorna Oscos-Eo. «Quedríamos que fora curiosa pa los participantes, pero que cunte col territoriu y les sos potencialidaes», sorrayó.

El vicerrector d’Estensión Universitaria, Francisco José Borge, esplicó que va un llustru que nun se desenvuelven estos cursos na cuenca noroccidental. El postreru tuvo llugar en Tapia de Casariego. «Hai un cursu d’estensión universitaria plantegáu pal cursu 2019-2020 nesta zona. va buscase una temática d’interés. Tamos buscando sinergias colos conceyos», esplicó Borge.

A lo último, el coordinador del Foru Comunicación y Escuela plantegó la posibilidá de retomar el proyectu d’una feria d’investigadores. «Anguaño nun pudo ser y gustaríanos que fuera posible en próximes ediciones», propunxo Fernández.

  Categories: