La Universidá sofita la idea de Fade y pide un plan de Formación Dual afechu a la industria

La Universidá sofita la idea de Fade y pide un plan de Formación Dual afechu a la industria
23 febreru 14:01 2018 Imprimir

El nuevu presidente de la Federación Asturiana d’Empresarios (Fade) propúnxolo y la Universidá d’Uviéu acoyolo a la primera, porque nel equipu rectoral sofiten la idea de Fade y pide un plan de Formación Dual afechu a la industria.

El pasáu martes, el líder de los empresarios apeló de nuevu al diseñu y puesta en marcha d’un modelu de formación dual qu’ayude a resolver la falta de mano d’obra cualificada, un problema que, según alvirtió, va percibise yá n’Asturies «nos próximos meses». Y darréu, el rector de la Universidá d’Uviéu, Santiago García Granda, tenía una respuesta afayadiza afechu a que “ye indispensable que s’empecipie un plan piloto n’Asturies nel que s’identifiquen tanto les titulaciones más demandaes pol texíu industrial como les empreses asturianes que quieran participar nun programa esperimental qu’incluya actividá na Universidá d’Uviéu y un contratu na empresa”.

Esta iniciativa precisaría, amiesta’l rector, “l’alcuerdu de l’Alministración y los axentes sociales del Principáu”. Y considera «importante» qu’esta llínea d’actuación tuviera contemplada nel Alcuerdu pa la Competitividá Económica y la Sostenibilidá Social, la denominada concertación, «que s’atopa a valir frutu del consensu ente Fade, CC OO, UXT y el Gobiernu autonómicu, de la mesma que lo ta la formación profesional dual». Dende’l Principáu nun se pronunciaron entá sobre la formación dual universitaria, pero sí recordaron que la FP dual ye una de los apuestes de les conseyeríes d’Educación y Trabayu.

Pela so parte, Juan Carlos Riolo, director de la Escuela Politécnica d’Inxeniería de Xixón (EPI), cunta que “merez enforma la pena esquizar esti modelu que tan bones resultancies ta dando nel País Vascu”, y considera positivu que Fade amosárase a favor del so impulsu, porque la so posible implantación rique «un fuerte compromisu» tantu de les empreses como del Gobiernu del Principáu.

  Categories: