La Universidá Popular Uvieina cierra’l cursu con récord de matrícula

La Universidá Popular Uvieina cierra’l cursu con récord de matrícula
18 xunu 09:20 2018 Imprimir

La Sala de Cámara del Auditoriu acoyó esti vienres el conciertu de fin de cursu de la Universidá Popular Uvieina, nel que participaron alumnos de los distintos cursos impartíos a lo llargo del añu na Escuela Municipal de Música. Al conciertu asistieron, amás, participantes de les distintes actividaes y talleres de la Universidá Popular.

La Universidá Popular Uvieina va cerrar oficialmente’l próximu 3 de xunetu’l presente curso académicu con un récord en númberu d’alumnos matriculaos y en materies impartíes. Un total de 1.550 alumnos cursaron anguaño dalguna de les asignatures y talleres de la Popular, con una ufierta de 63 cursos añales y otros 27 más de calter semestral o trimestral. Los datos suponen una medría d’un 40 per cientu na demanda respecto al arranque de la primer edición de la Popular Uvieina, qu’echó a andar n’ochobre de 2016. Anguaño más de 5.000 alumnos pasaron yá poles aules d’esti nuevu serviciu públicu qu’amás d’averar la cultura a tolos rincones del conceyu, dexa completar la formación en determinaes materies y adquirir nueves conocencies.

Amás, la Universidá Popular funcionó tamién como una nueva ferramienta para atopar emplegu, como se vio col programa Sara, en collaboración cola Conceyalía d’Economía, de formación nel ámbitu sanitariu. El proyectu, sirvió para emplegar a la mayor parte de les muyeres mayores de 45 años que participaron nel programa.

La Conceyalía d’Educación yá ta trabayando na programación del próximu cursu. La información publicarase’l próximu mes d’agostu y la matrícula va poder empezar a formalizase en septiembre. La Universidá Popular ta integrada na Federación Española d’Universidaes Populares.

  Categories: