La Universidá Popular empecipia’l cursu con 13 nueves asignatures y temátiques como la ciencia

La Universidá Popular  d’Uviéu (UPO) ta preparada para empecipiar un nuevu cursu académicu con munches novedaes, más ufierta y los mesmos precios que’l cursu anterior. Les asignatures van pasar a ser de duración añal a pidimientu de los usuarios y caltienen los mesmos precios del añu pasáu.

El plazu d’inscripciones ta abiertu para toos aquellos mayores de 16 años que tean comenenciudos n’aumentar la so formación y pal primer trimestre 2017-2018 la ufierta inclúi un total de 38 asignatures distintes, calteniendo les ufiertaes en cursos anteriores y reforzando el programa con otros 13 cursos más. Amás, a pidimientu de los usuarios, la mayoría van tener una duración añal, en llugar de trimestral, según esplicó esta selmana na presentación de la nueva programación de la UPO la conceyala d’Educación, Mercedes González. “La mayoría de los cursos van ser añales, anque, pola so configuración, caltenemos dalgunu trimestral. Yera unu pidimientu de la mayoría de los usuarios y cumplimos”, manifestó.

La Universidá Popular, un nuevu serviciu na ciudá para democratizar la cultura y la conocencia, ye una iniciativa desenvuelta pola Conceyalía d’Educación del Conceyu d’Uviéu tres la so llegada al gobiernu municipal que cunta yá cola reconocencia fora d’Uviéu, tres la so inclusión na Federación Española d’Universidaes Populares y gracies a proyectos como’l programa SARA (compartíu cola Conceyalía d’Empléu), que dexó a muyeres uvieines atopar un empléu nel ámbitu sociosanitariu.

Dende la so puesta en marcha l’añu pasáu, la demanda llegó a superar a la ufierta con llista d’espera y más d’un millar d’alumnos matriculaos en cada trimestre. Inspirada en valores como la igualdá, la integración, el respetu al mediu ambiente y l’educación pa la paz, los oxetivos qu’escuerre la Universidá Popular son favorecer el desenvolvimientu integral de les persones y ufierta-yos la posibilidá d’actualizar o ampliar la so formación dende los distintos barrios de la ciudá a precios algamadizos. Por ello, la Conceyalía d’Educación decidió entornase con esta convocatoria ampliando la ufierta y ufiertando nueves temátiques. Asina, per primer vegada la ciencia va llegar a les aules de la Universidá Popular con cursos d’astronomía, matemátiques y xeometría.

La hestoria tamién va ocupar un llugar importante na ufierta con asignatures sobro’l Camín de Santiago o l’Arte Prerrománico. Pero va haber tamién chisgos a l’actualidá con una asignatura p’ayudar a contextualizar y entender el mundu actual. Otra de les novedaes d’anguaño ye un cursu sobro la xestión de les emociones, un campu que tampoco se trató hasta agora. Coles mesmes, la Universidá Popular va enseñar per primer vegada español a estranxeros.

Tamién s’incorpora per primer vegada a la ufierta formativa de la UPO l’apartáu de xéneru, que va impartise con calter trimestral cola collaboración del Grupu d’investigación Demeter sobre, maternidá, xenero y familia de la Universidá d’Uviéu. Amás, la programación inclúi’l cursu “Historia de les escaecíes”, un programa diseñáu pa dar mayor visibilidá a la muyer y el so papel na hestoria. Nesti marcu, la Universidá Popular robló un conveniu de collaboración cola Asociación Trelce Roses Asturies pa dar a conocer la trayectoria de destacaes muyeres al traviés del caleyeru.

Toles actividaes y cursos ufiertaos estremaense en dolce bloques: Hestoria y Humanidaes; Piscología y emociones; Conocer la nuesa ciudá; Llingua y lliteratura; Medios audiovisuales; Ciencia, Mundu actual; Artes gráfiques; Música; Música tradicional; Deportes; y Salú y entrenamientu.

La matrícula de la mayoría de los cursos tien un preciu de 44,33 euros al añu, sacante’l cursu “Taller de Estimulación Mental y Memoria” que la so matrícula ye de 29,55 euros. Los cursos trimestrales tienen un preciu de 14,78 euros, sacante “Apriende a comer bien”, “¿Quies perfeccionar la to alimentación? y “Xuegos matemáticos y la guapura de la Xeometría”, que la so matrícula ye de 9,85 euros. Tou ello según la ordenanza númberu 306, que regula’l preciu públicu por prestación de servicios dependientes de les Conceyalíes d’Educación y Centros Sociales.

Pa matriculase en dalgún de los cursos de la Universidá Popular pue recoyese la solicitú de preinscripción na Conceyalía d’Educación de llunes a vienres n’horariu de 9.00 a 14.00, nel Rexistru auxiliar de La Corredoria nel mesmu horariu, al traviés de la páxina web del Conceyu d’Uviéu www.oviedo.es, o nel Rexistru Xeneral de 9.00 a 14.00 de llunes a vienres y los sábados de 10.00 a 12.00 hores. Tamién pue aportase a la prescripción por aciu el rexistru en see electrónica. El plazu pa faer esti trámite va ser ente’l 4 al 15 de setiembre y el pagu va efectuar mientres los cinco díes arteros a la de la publicación de la llista de los almitíos.