La Universidá Popular de Xixón entama nuevos cursos

by redacción asturnews | agosto 30, 2016 4:06 pm

Como cada cuatrimestre la Universidá Popular de Xixón vieno acabante de dar anuncia a nuevos cursos y talleres que dan respuesta a nueves esmoliciones culturales y d’ociu en toles árees temátiques. 

Tratase de 155 cursos que van dar empiezu a partir del 5 d’ochobre, según el programa, y van impartise en 15 centros distintos de la ciudá, dos de los cualos suponen tamién una novedá: el Muséu Casa Natal de Xovellanos y el Muséu Nicanor Piñole que vienen a incorporase a los espacios habituales en que la UP desenvuelve los sos cursos.

Nesta ocasión, incluyense novedaes tales como Lleguminoses y suelos: simbiosis pa la vida, Rembrandt y Caravaggio: dos maestros frente al clasicismu, La ópera espiritual, Esperiencies cola acuarela: siguiendo la buelga de Piñole, Satélites: tecnoloxía espacial y mediu ambiente, Menúes infantiles curiosos, La ciencia al traviés del cine o Lliteratura española: de los alboreceres al Sieglu d’Oru, anque nun son los únicos.

Ye posible consultar equí tola programación[1] y aportar al catálogu de conteníos[2] y oxetivos propuestos pa cada unu de los cursos o talleres, onde tamién s’esclaria si ye preciso tener conocencies previes, apurrir dalgún material o recursu y otres indicaciones previes que ye importante conocer antes del empiezu de matrícula a partir del próximu 13 de setiembre.

La programación impresa va tar disponible en tolos centros municipales nos primeros díes de setiembre. Pa cualquier dulda o consulta, pue contactase en upgijon.es o llamando a los teléfonos 985 18 10 32 y 985 18 17 88.

Endnotes:
  1. programación: http://up.gijon.es/multimedia_objects/download?object_id=198984&object_type=document
  2. catálogu de conteníos: http://up.gijon.es/multimedia_objects/download?object_id=198865&object_type=document

Source URL: http://asturnews.com/la-universida-popular-de-xixon-entama-nuevos-cursos/