La Universidá escueye rector con presencia del asturianu

La comunidá universitaria asturiana ta llamada a escoyer güei al so rector, ente cuatro candidatos que ya votaron nes primeres hores, pero ensin qu’haya un claru favoritu. Per primera vegada un candidatu, Santiago García Granda, emplegó l’asturianu davezu na so campaña electoral y comprometió una Oficina de Normalización.

Los 24.957 electores van poer decantase por unu de los cuatro aspirantes: los catedráticos Santiago García Granda, de Química Física; Pedro Sánchez Llazu, de Bioquímica y Bioloxía Molecular; José Muñiz, de Psicometría, y Agustín Mariña, de Química Analítica. Nun ye la primer vegada qu’hai cuatro candidatos nunos comicios de la Universidá, pero sí ye la primer vegada qu’un candidatu emplega l’asturianu y manifiesta la ufierta de crear una Oficina de Normalización.

Dempués d’una xornada na que les 22 meses electorales van tar abiertes ente les 10 y les 19 hores, los candidatos a Rector esperen conocer l’escrutiniu alrodiu les 20.30 hores. Muncho más rápido que hai dos mandatos por cuenta de les nueves tecnoloxíes, un aspeutu que tamién marcó esta campaña electoral, onde les propuestes pudiéronse conocer nes redes sociales.

Dende 2008 esiste’l sufraxu universal ponderáu, que sostituyó’l formatu nel que’l claustru yera quien escoyía al rector. Asina, el votu de el profesores doctores, con 1.309 representantes, tien un pesu d’un 55%; el del restu del personal docente ya investigador, con 1.121 miembros, un 10%; el de los estudiantes de los trés ciclos (21.580), un 25%, y el de la PAS (947), un 10%. Con al respective de les elecciones de 2012, el censu menguó en 2.025 persones, sobremanera, nel grupu estudiantil, con 1.402 alumnos menos.