La universidá d’Uviéu ye candidata al top 500 de Shangai

La universidá d’Uviéu ye candidata al top 500 de Shangai
20 agostu 12:49 2018 Imprimir

El Ranking Académicu de les Universidaes del Mundu (ARWU), el Shangai, considera que son siete les principales «candidates» españoles a ingresar en próximos años nel ‘top 500′ y qu’una d’elles ye la d’Uviéu.

El top 500 correspuéndese coles posiciones 501 a 600 de la llista complementaria y les siete universidaes que podríen entrar nelli son la Jaime I de Castellón, la Politécnica de Madrid, y les universidaes d’Uviéu, Sevilla, Isles Baleares, Vigo y Zaragoza. Esta clasificación ye l’ampliada del ranking oficial, que se publicara en 2017 per vegada primera del puestu 501 al 800 y qu’anguaño s’amplió hasta los 1.000 campus.

El Ranking Académicu de les Universidaes del Mundu (ARWU), ellaboráu como cada añu pola Universidá Jiao Tong de Shanghái y dáu a conocer estos dies, confirmó los dos cares del sistema d’educación cimera español, con una amenorgada presencia ente la élite mundial y pela contra con un bien altu nivel mediu na mayoría de los campus públicos del país.

El conocíu como ‘ranking de Shanghái’, la clasificación planetaria d’universidaes más antigua, prestixosa ya influyente, na so edición de 2018, solo inclúi a diez centros españoles ente los 500 meyores, uno menos que l’añu anterior, lo que confirma una perda de presencia na élite mundial, con una pinga negativa y siguía dende 2015, cuando España algamó’l so máximu y llogró asitiar a 13 campus n’este ‘top 500′. Como asocede dende la primer edición, en 2003, nun hai españoles ente los cien primeros y l’Universidá de Barcelona ye la única que llogra tar ente los 200 meyores, daqué que’l centru catalán consigue dende 2014, col paréntesis del añu pasáu.

Sicasí, la mesma institución académica publicó tamién la llista de les que considera les otres 500 grandes universidaes del planeta, les clasificaes ente los puestos 501 y 1.000, la clase media mundial de la educación cimera, munchos de que los sos centros, según aseguren los espertos asiáticos, «tienen potencial» y engarren yá por dar el saltu en próximos años al ‘top 500′. La llista ampliada demuestra que 33 universidaes españoles –toes públiques sacantes la Universidá de Navarra– tán ente les 1.000 meyores del mundu, un nivel que solo pueden acreditar el 6% de los centros d’educación cimera de los cinco continentes. Esto significa qu’el 64% de los campus públicos españoles, dos de cada trés, tán ente los de mayor calidá del planeta.

La razón principal qu’alloña a los campus nacionales de los primeros puestos ye qu’el ‘ranking de Shanghái’ valora esencialmente la investigación de bien altu nivel (sobremanera la científica y técnica) percima de la docencia y prima con hasta un 30% de puntuación a les universidaes con alumnos y profesores en posesión del premiu Nobel o la medaya Fields (Matemátiques), de los qu’España escarez. Roberto Fernández, presidente de el rectores españoles, amás de recordar que pa tar enriba n’este ranking hai que poder fichar a premio Nobel, defende que ye más importante tener 33 universidaes ente les 1.000 de mayor calidá que dos ente les cien meyores y el restu de baxu nivel, porque «lo importante ye’l sistema, que tolos centros tengan xuna calidá asemeyada y homologable a los europeos».

La élite española, según el ‘top 500′ de ARWU, ta compuesta per diez centros, tres la salida anguaño de la Jaime I de Castellón. La Universidá de Barcelona ye la única allugada ente los puestos 150 y 200 y siguila la Complutense de Madrid, la Pompeu Frabra y la de Granada, toes elles ente les posiciones 201 y 300. Nel siguiente pasu, nel grupu de les 301 a 400 meyores, tán l’Autónoma de Madrid y la de Barcelona y la Universidá del País Vascu. Ente l’últimu centenar de la clasificación principal tán la Politécnica de Valencia y les universidaes de Santiago de Compostela y Valencia.

Les diez primeres posiciones del ‘ranking de Shanghái’ tán acopaes poles ocho principales universidaes estadounidenses, con Harvard y Stanford a la cabeza, y poles dos pernomaes britániques, Cambridge –que s’asitia nel tercer puestu– y Oxford (séptima). Nun hai posibilidá d’atopar un campus que nun perteneza a unu d’estos dos países hasta la posición 19, onde s’alluga l’Institutu Federal Suizu de Tecnoloxía, con see en Zurich.

El dominiu estadounidense ente les meyores universidaes del mundu ye apolmonante. Nel ‘top 20′ de centros atropa 16; nel ‘top 100′ tien 46; y nel global de les 500 principales, 139. Sígenlu como potencies universitaries China, con 65 centros (cinco más qu’en 2017), y Gran Bretaña, con 39 campus, ocho d’ellos nel ‘top 100′.

  Categories: