La Universidá d’Uviéu xube a la segunda posición nel informe sobro tresparencia de les universidaes 2019 ellaboráu, como cada añu, pola Fundación Compromisu y Tresparencia. La institución pública asturiana esguila ventiún puestos y pasa a asitiase casi a la cabeza del país, compartiendo puntuación coles de Burgos y Cantabria.
En 2018, la Universidá asturiana ocupaba’l puestu 23, considerándonse una institución tresllúcida al cumplir 38 indicadores. En 2019, sicasí, algamó 50 indicadores y asítiase ente les cuatro universidaes públiques más tresparentes del país, según informó al traviés d’una nota de prensa.
L’informe de la Fundación Compromisu y Tresparencia mide la tresparencia voluntaria de les universidaes y nél participaron mediu centenar d’instituciones públiques y 26 universidaes privaes. Anguaño, la organización quixo destacar la capacidá de reacción y adaptación de les universidaes públiques frente a la crisis sanitaria provocada pola covid 19.
Nesti sentíu, valora que’l porcentaxe d’universidaes públiques tresparentes ye’l más altu (65%) desque se publicar l’informe, ente que les universidaes calificaes como opaques amenórguense puramente a cuatro.
