La Universidá d’Uviéu va analizar la innovación dixital nel aprendizaxe

La Universidá d’Uviéu va analizar la innovación dixital nel aprendizaxe
08 abril 09:21 2021 Imprimir

La Universidá d’Uviéu entama un congresu internacional que, mientres trés díes, va analizar la innovación dixital en redolaes d’aprendizaxe que baxu’l nome de CITEA va ser 100% telemáticu y va desenvolvese ente’l 13 y el 15 de mayu.

El Congresu va centrase en cómo pueden aplicase les nueves tecnoloxíes nel sistema educativu, afaciéndose nestos tiempos de teletrabayu a les necesidaes que se crearon non solo pola pandemia, sinón tamién pola evolución dixital de la sociedá y el cada vegada mayor accesu a les ferramientes tecnolóxiques de los estudiantes y les families.

El Congresu va llamase CITEA (Congresu Internacional de Tresformamientu dixital en Redolaes d’Aprendizaxe), va ser 100% telemáticu, va tener llugar ente’l 13 y el 15 de mayu y nél van participar espertos d’universidaes de tol mundu, sobremanera europees y de Suramérica. Ta dirixíu a profesores, estudiantes -que van llograr certificáu oficial de participación o asistencia- y públicu polo xeneral, pos munchos de les temes van interesar tamién a profesionales y families.

La cita, punta de llanza n’España sobro una tema cada vez más presente en toles etapes educatives y formatives, va cuntar con más de 50 ponencies y meses redondes, pero tamién va haber comunicaciones orales y escrites de los cientos de participantes que van dar forma a esta gran cita educativa, pensada dende Asturies pa tol mundu. Nella van participar espertos de tolos campos educativos: universidaes -más de 40 catedráticos confirmaron yá la so participación-, Educación Secundaria, Primaria, Formación Profesional, redolada profesional…

Les ponencies y meses redondes, y les comunicaciones de los participantes, van xirar en redol a cinco grandes exes temátiques. La primera d’ellos céntrase nes estratexes y esperiencies de tresformamientu dixital na comunidá educativa, y va analizar los escenarios que l’actualidá ufierta pa desenvolveles. va poner sobro la mesa toa lo aprendío mientres el confinamientu y l’estáu d’alarma, pa ver qué elementos pueden permanecer una vegada torne la normalidá. Pero tamién se van encetar temes como’l ‘Edutaiment’, o entretenimientu educativu, unu de los campos que más van crecer nos próximos años, y qu’averen la esperiencia educativa a los usuarios cola introducción d’elementos propios de videoxuegos o plataformes d’entruga-respuesta con más curiosu del que tamos avezaos. va falar d’escenarios multivirtuales y del diseñu y desenvolvimientu d’esti tipu de ferramientes educatives.

Una segunda exa temática va tratar sobro’l tresformamientu dixital na evaluación ya intervención socioeducativas. Dende aplicaciones que favorezan xuna alimentación y vezos saludables a otres que dexen la supervisión parental de les actividaes de los neños na escuela, pasando por terapies digicéuticas na redolada escolar -l’usu de realidá virtual y aumentada p’arreglar ciertu tipu problemes-, ferramientes d’aprendizaxe autorregulado y otres qu’ameyoren, por casu, les habilidaes de lectoescritura o’l cálculu matemáticu, por poner dellos exemplos.

Nun se va escaecer el Congresu Internacional de Tresformamientu dixital en Redolaes d’Aprendizaxe del impactu que tuvo y va tener nes families el teletrabayu y la educación a distancia. Una tercer exa temática va encetar al traviés de los principales espertos na materia cómo fueron les clases virtuales y el procesu d’aprendizaxe en casa en tiempos de confinamientu, según la necesidá d’encetar problemes derivaos tantu de la educación a distancia como del teletrabajo, baltes como la fienda dixital y la necesidá de conciliación familiar y les xeres escolares.

Tocantes a la innovación en redolaes profesionales, va falase de temes como ‘Life-long learning’ (aprendizaxe permanente) y formación executiva, amás del usu de los llamaos ‘Serious games’ aplicaos a la formación na empresa y otres soluciones formatives basaes en tecnoloxía (‘eLearning’, realidá virtual, etcétera). Va Haber tamién aportaciones ya investigaciones sobro’l tresformamientu dixital en formación empresarial y departamentos de recursos humanos.

Y la quinta exa temática va analizar la innovación dixital nel ámbitu de la Formación Profesional, con atención especial a la FP Dual.

  Categories: