La Universidá d’Uviéu trai a Siero unos talleres para averar la ciencia a los neños

La Universidá d’Uviéu trai a Siero unos talleres para averar la ciencia a los neños
03 mayu 11:50 2019 Imprimir

La Universidá d’Uviéu y el Serviciu de Promoción Económica y Desenvolvimientu Local de Siero van desenvolver en mayu y xunu na Pola un novedosu programa de cultura y ciencia, denomináu ‘Universidá para peques’, que va empobináu a neños d’educación Infantil y Primaria con edaes de 4 a 10 años.

El principal oxetivu d’estos talleres ye espertar l’interés pola ciencia ente los más pequenos y da-yos a conocer los sos distintos oficios. El programa va constar de trés talleres, que van durar un total de seis selmanes, y que se van impartir nel Auditoriu polesu los martes y xueves pela tarde, y los sábados pela mañana. Los beneficiarios van ser 96 neños -estremaos en dolce grupos por edaes- de segundu y terceru d’Infantil y de primeru a cuartu de Primaria. Les inscripciones van poder realizase a partir de mañana, a les 9 hores, na páxina web del Conceyu. El plazu va tar abiertu hasta completar les places, que se van asignar por rigorosu orde d’inscripción.

Los trés talleres lleven por títulu ‘Camisetes con ciencia’, ‘¿Qué lu pasa al planeta?’ y ‘Amiestos misteriosos’. Nellos encetarán temes diversos» como la ecoloxía, la química o conceutos de física, según esplicó ayeri la coordinadora científica y técnica del programa, Laura Raspies. «Ye xuna acción d’altu impactu nos neños y pretendemos que sía un aprendizaxe significativu», dixo.

El primer Conceyu

El conceyal d’Economía de Siero, Alberto Payares, destacó que ye la primer vegada qu’esti programa llevar a cabu fora de les sedes oficiales de la Universidá, «polo que tamos bien arguyosos de que sía en Siero». Comentó que les conversaciones cola institución empecipiárense nel mes de marzu «y hubo un entendimientu total». Y destacó la participación de distintos departamentos municipales «de manera efectiva, que nun ye daqué senciellu».

El rector de la Universidá d’Uviéu, Santiago García, destacó igualmente la collaboración pionera del Conceyu de Siero «pa sacar la Universidá de los nuesos allugamientos habituales». Y apuntó que dende’l pasáu mes d’avientu, en que punxeron en marcha los talleres STEAM (Ciencia, Tecnoloxía, Inxeniería, Arte, Matemátiques), participaron trés mil neños en Mieres, Avilés, Uviéu y Xixón.

Mientres la presentación fíxose tamién mención a la escasez de muyeres matriculaes en delles carreres de ciencies, d’ende qu’esti programa puede contribuyir tamién a espertar una vocación temprana nos neños y que puedan desenvolver competencies tecnolóxiques y científiques.

Na presentación del programa tuvieron tamién presentes la xerente de la Fundación Universidá d’Uviéu, Cecilia Bethencourt, y la concejala d’Educación y Cultura del Conceyu de Siero, Aurora Cienfuegos.

  Categories: