La Universidá d’Uviéu torna abrir n’agostu dempués de cuatro años

La Universidá d’Uviéu torna abrir n’agostu dempués de cuatro años
24 xunetu 09:12 2017 Imprimir

La Universidá d’Uviéu nun va cerrar por vacaciones y al contrariu lo qu’asocediera nos postreros cuatro años, l’atención al públicu presencial y les xeres alministratives que la institución académica suspendía demientres quince díes  caltendrá esti branu total normalidá.

«Entendemos qu’hai que caltener en tou momentu un puntu d’accesu p’atender cualquier necesidá que puedan tener los estudiantes, el nuesu personal, les instituciones o la sociedá polo xeneral. Nun tien sentíu qu’una institución como la Universidá cierre les sos puertes. La sociedá tien qu’atopanos siempres que nos precise», argumenta’l rector, Santiago García Granda, convencíu de que «una Universidá zarrada ye un espilfarru que nun nos podemos dexar».

El zarru veraniegu de la Universidá empezó en 2013. Siendo rector Vicente Gotor, el Conseyu de Gobiernu aprobó un calendariu llaboral qu’afitaba la segunda y tercer selmana d’agostu como «periodu vacacional obligatoriu». El 5 d’agostu d’aquel añu foi la primer vegada en que la institución académica cerró les sos puertes pa tola comunidá universitaria -anque los grupos d’investigación, por casu, siguíen trabayando con normalidá-  coles mires d’acutar gastos y llegar a la fin del exerciciu ensin xenerar déficit. La midida pretendía ser xuna ferramienta d’aforru tres los retayos aplicaos al presupuestu de la Universidá dende 2011.

Pero, según el criteriu del actual equipu rectoral, «esi zarru tampoco suponía un aforru significativo», razón pola que s’optó por revertir esa situación. Recuerda García Granda que, pese al zarru d’instalaciones, «los sueldos del personal siguen pagándose» y, amás, «tas obligando al personal a esfrutar de parte del so periodu vacacional nunes feches concretes». Con too, a la fin «lo que llográbamos yera poner dificultaes pa quien quería faer un trámite o pidir información sobro la Universidá».

  Categories: