La Universidá d’Uviéu normaliza l’usu del asturianu

La Universidá d’Uviéu normaliza l’usu del asturianu
22 xunetu 10:52 2018 Imprimir

L’aprobación esti vienres de la Propuesta de Reglamentu Regulador del usu del asturianu na Universidá d’Uviéu entama un procesu de normalización llingüística que va ser sofitáu tamién nuna Comisión Asesora de Normalización Llingüística que se va crear darréu.

La institución académica asturiana da pie asina a poder presentar escritos, comunicaciones y solicitúes redactaos en llingua asturiana énte los servicios universitarios, magar estos van siguir operando en castellán como idioma prioritariu na so tramitación. L’anunciu foi fechu esti vienres per parte del Rector, Santiago García Granda, al términu del Conseyu de Gobiernu y l’actuación respuende, según Granda, “al cumplimientu d’una sentencia xudicial”, tres de que’l reglamentu anterior relativu al usu del asturianu na universidá de 2009, fora recurríu pol Aconceyamientu de Xuristes pol Asturianu (AXA) y el dictame xurídicu final obligara a camudalu.

El cambéu solo va afectar a les relaciones ente la sociedá y l’alministración universitaria, pos nun va ser aplicable a les relaciones docentes que se fain davezu col alumnáu, sigún desplicó’l Rector. Esto ye, trabayos, exames y otres actuaciones académiques van siguir exentos de l’aplicación d’esta normativa.

La unidá alministrativa encargada de xestionar los documentos presentaos n’asturianu va tener d’incorporar al espediente la so correspondiente traducción al castellán p’asina poder prosiguir la so tramitación, lo que pue suspender los procedimientos en marcha hasta la recepción de la interpretación definitiva, que se va pidir a la Unidá de Traducción de l’Alministración del Principáu, y el solicitante va ser informáu del retrasu causáu por esa transposición llingüística.

El Conseyu de Gobiernu de la Universidá d’Uviéu tamién aprobó ayeri la creación d’una Comisión Asesora de Normalización Llingüística, órganu encargáu d’asesorar a la institución académica en relación al usu de la llingua asturiana na universidá.

Loading Facebook Comments ...