La Universidá d’Uviéu celebra la tercer Nueche Llunática

11 ochobre 10:57 2013 Imprimir

La Universidá d’Uviéu acueye la tercer edición de la Nueche Llunática, una iniciativa impulsada dende la Facultá de Ciencies p’averar l’astru más cercanu a la Tierra, la Lluna a los neños y adultos. Dende les 20:00 y hasta les 23:30 hores investigadores de la Universidá d’Uviéu van emponenos na observación d’oxetos celestes con telescopios instalaos nel esterior de la facultá.

La observación va tener llugar nel xardín sur de la facultá de Ciencies, y a pesar de la presencia de faroles, podrán reparase los cráteres de la lluna, dellos planetes y otros oxetos celestes.

Pensóse en tou y en casu de que la climatoloxía nun dexe reparar el cielu, podrá faese la observación, en tiempu real de la lluna, utilizando la sala d’ordenadores de la facultá.

Nesta edición, al coincidir la InOMN cola fecha de la llegada de Cristóbal Colón a América preparáronse distintos materiales nos que se pon de manifiestu la relación de l’astronomía col saléu, la cultura y l’arte prehispánico. Asina, los asistentes van poder aprender cómo saber les sos coordenaes n’alta mar, qué conocencies d’astronomía impulsaron a Colón a aventurase al traviés del océanu o cómo los pueblos americanos yeren capaces de predicir eclises con exactitú. Paralelamente, preparáronse otres actividaes de divulgación científica como; representación a escala del Sistema Solar, sesiones de cine (na que se van amosar pequeños documentales), videoxuegos educativos y talleres astronómicos.

El pasáu añu l’eventu celebróse simultáneamente en 577 ciudaes de 49 países de too el mundu. La entrada ye llibre y gratuita.

  Categories:
Loading Facebook Comments ...