Portada Educación La Universidá d’Uviéu amenorgó la so ufierta de graos nun 12% na última década

La Universidá d’Uviéu amenorgó la so ufierta de graos nun 12% na última década

by redacción asturnews
Foto: Hugo Pardo Kuklinsk (https://www.flickr.com/photos/18016623@N00/)

Según un informe del Observatoriu del Sistema Universitariu, presentáu ayeri, la Universidá d’Uviéu amenorgó la so ufierta de graos nun 12% na última década. En relación col conxuntu d’universidaes españoles, l’asturiana ufierta proporcionalmente menos graos de Ciencies Sociales y Xurídiques y más d’Inxeniería y Arquitectura y de Ciencies.

Asturies ye una de les comunidaes nes qu’en mayor proporción amenorgóse’l númberu de graos universitarios disponibles arriendes de la implantación, en 2007, del plan Bolonia pa la ordenación del espaciu universitariu européu. En concretu, perdió siete carreres. Con una ufierta un 12% inferior, ye, tres Galicia, la segunda comunidá en que más menguó la ufierta académica. Sígenlu Castiella-La Mancha (-11 %) y Baleares (-10 %). Según un informe del Observatoriu del Sistema Universitariu, presentáu ayeri, en relación col conxuntu d’universidaes españoles, l’asturiana ufierta proporcionalmente menos graos de Ciencies Sociales y Xurídiques y más d’Inxeniería y Arquitectura y de Ciencies. Los 52 graos de la Universidá d’Uviéu apenes suponen el 2% del conxuntu de la ufierta de graos de toa España.

Al contrariu del Principáu, el mentáu informe señala coles mesmes que la ufierta de graos universitarios aumentó nel conxuntu del país un 13% na última década, sobremanera nes universidaes privaes. Una medría que, alverten el autores del informe, «non siempres ta xustificáu» y convierte la ufierta en «inintelixible pa les families». En concretu, col pasu del Catálogu de Títulos Universitarios al Rexistru d’Universidaes, Centros y Títulos, en 2008, la ufierta d’estudios aumentó un 2% na universidá pública española y un 66% na privada.

Tamién te podria gustar