Portada Educación La Universidá d’Uviéu allugase nel ‘top 5’ de les de mayor rendimientu del país

La Universidá d’Uviéu allugase nel ‘top 5’ de les de mayor rendimientu del país

by redacción asturnews
Foto: Hugo Pardo Kuklinsk (https://www.flickr.com/photos/18016623@N00/)

El ranking d’universidaes españoles que dende va siete años ellabora la Fundación Conocencia y Desenvolvimientu presentábase esti miércoles y asitiaba nesta edición a la Universidá d’Uviéu nel ‘top 5’ de les instituciones académiques de más altu rendimientu del país.

Asturies ye la cuarta comunidá nesta estadística que fai un analís de 76 universidaes (el 91% de les 81 qu’impartíen enseñances de grau en 2019) y qu’encabecen les de Cataluña, Navarra y País Vascu, per delantre d’Asturies. Por detrás del Principáu, anque a bien curtia distancia, asítiense les instituciones académiques de la comunidá de Madrid. La Universidá d’Uviéu llogra les más altes calificaciones en dieciséis de los 37 indicadores que se tienen en cuenta nel ranking y que s’estremen en cinco bloques: enseñanza y aprendizaxe, investigación, tresferencia de conocencia, orientación internacional y contribución al desenvolvimientu rexonal.

Ente otres cuestiones, la Universidá asturiana destaca na tasa de graduación y de rendimientu de los sos alumnos de máster, na movilidá de los sos estudiantes, el volume de práctiques que se realicen n’empreses de la rexón, o les titulaciones (tantu de grau como de máster) impartíes nun idioma estranxeru, ensin escaecer les publicaciones por profesor y les patentes concedíes por profesor, los tramos d’investigación o los fondos privaos y los fondos esternos d’investigación captaos.

Según el citáu informe, qu’asitia los estudios d’ADE, Educación y Economía ente los de mayor insertamientu llaboral, nel conxuntu del país les que llogren meyores resultaos son les universidaes Autónoma de Barcelona, Barcelona, Navarra, Pompeu Fabra, Autónoma de Madrid, Ramon Llull (privada), Carlos III de Madrid, Rovira i Virgili, Pontificia Comillas (privada), Deusto (privada), Mondragón (privada), Girona, Politécnica de Cataluña, Valencia-Estudi Xeneral y Politécnica de Madrid. Con respectu al informe del añu pasáu, la universidá de Navarra recupera’l segundu puestu, arrampuñáu entós pola Autónoma de Madrid, que vuelve al quintu llugar que tenía en 2018.

Per primer vegada’l Ranking CyD inclúi indicadores sobro l’emplegu y l’insertamientu llaboral de los titulaos universitarios. Los que presenten una tasa d’afiliación a la seguridá social más elevada de los graduaos (cursu 2013-2014) nos años 2015 y 2018 son ADE, Educación y Economía.

Tamién te podria gustar