La Universidá d’Uviéu afayase a los estudiantes tranxéneru

La Universidá d’Uviéu afayase a los estudiantes tranxéneru
02 10:01 2017 Imprimir

El rector de la Universidá d’Uviéu, Santiago García Granda, prometiera nel so programa electoral afayar les instalaciones a los estudiantes tranxéneru y ta a piques de percumplilo.

Nel epígrafe dedicáu a los estudiantes falaba de que quería consensuar estratexes por que “a curtiu, mediu y llargu plazu” afigurara en planes institucionales que promovieren “la igualdá, la non discriminación por razón de xéneru, orientación/identidá sexual, relixón o etnia”. Entós, n’abril de 2016, comprometiose a dar respuesta específica a tolos colectivos y apuntaba directamente a que, nel casu del colectivu tranxénero, camudaría “la señalización de los baños públicos, estableciendo un númberu razonable d’ellos como mistos y facilitaría el cambéu de datos personales simplificando la so solicitú y reflexándolo de forma inmediata na documentación alministrativa”.

Un añu y trés meses dempués de tomar posesión del so cargu, l’equipu rectoral vieno acabante dar pasos nesti sentíu. Yá esisten siete baños unisex. Tán nes facultaes d’Humanidaes (campus d’El Milán), Psicoloxía (zona centro) y Formación del Profesoráu y Educación (Llamaquique). Son baños, ensin urinarios masculinos, que pueden usase independientemente del xéneru al qu’unu perteneza.

El proyectu púnxose en marcha esta primavera y, aprovechando’l branu, acometiéronse les obres. La Universidá d’Uviéu ye pionera n’España nesti sentíu y exemplifícase nel casu de que’l edificiu rectoral tamién tien esti tipu de baños.

L’equipu rectoral cumple, asina, con un compromisu, que se refuerza tres de la xunta col Observatoriu pa la Diversidá Sexual Disex. L’acoyida nesti sen paez que foi bona y asina lo confirma’l decanu d’Humanidaes, José Antonio Gómez: “Dende finales de setiembre, cuntamos con dos: unu nel edificiu departamental y otru nel aulariu A. Y la reacción del alumnáu y del profesoráu foi bona”. La elección d’estes trés facultaes respuende, en principiu, a que hai una mayor concienciación sobro les cuestiones de xéneru.

  Categories: