Portada Educación La Universidá confía en que la nueva PAU nun xenere “tantu discutiniu”

La Universidá confía en que la nueva PAU nun xenere “tantu discutiniu”

by redacción asturnews
Foto: Hugo Pardo Kuklinsk (https://www.flickr.com/photos/18016623@N00/)

L’asignatura troncal de modalidá de segundu cursu de Bachilleratu de la prueba de la fase xeneral obligatoria pal accesu a la Universidá va ser clave, yá que va poder sumar dos veces, por cuenta de que tamién va poder puntuar na fase específica opcional y darréu d’ello la Universidá d’Uviéu confía en que la nueva PAU nun xenere “tantu discutiniu”.

Asina lo indicó la selmana pasada la vicerrectora d’Estudiantes de la Universidá d’Uviéu, Elisa Miguélez González, que’l pasáu martes asistió a la sesión plenaria de la Comisión Sectorial d’Asuntos Estudiantiles de la Conferencia de Rectores de les Universidaes Españoles (CRUE) na que s’alcordó la nueva Prueba d’Evaluación de Bachilleratu y Accesu a la Universidá, sobre la qu’entá falta por determinar si’l so acrónimo va ser EBAU o EvAU. La responsable señaló que l’alcuerdu alcanzáu pa la prueba d’accesu tien calter transitoriu y amosóse confiada en que’l Ministeriu d’Educación empiece llueu los trabayos pa llegar a un alcuerdu definitivu que nun xenere «tanto discutiniu» como l’actual.

Na rueda de prensa posterior al Conseyu de Gobiernu de la Universidá, Miguélez precisó que l’asignatura troncal xeneral de modalidá ye clave porque va puntuar na fase obligatoria y na opcional. «Asina, un alumnu podría llograr hasta doce punto na prueba ensin necesidá de faer nengún exame de la fase opcional», esplicó.

La calificación final pal accesu a la universidá va ser calculada por aciu la ponderación del 60% de la media de Bachilleratu xuntu col 40 % de la nota llograda na prueba, que va constar de dos fases, una obligatoria (accesu) y otra opcional (almisión). Pa la evaluación de la fase obligatoria va resultar imprescindible tener cursaes los cuatro materies troncales obligatories de cada modalidá de Bachilleratu: los trés troncales xenerales comunes más la xeneral de modalidá.

 

Tamién te podria gustar