La Universidá becará a 27 alumnos por que moren nel campus de Mieres

La Universidá becará a 27 alumnos por que moren nel campus de Mieres
20 agostu 12:30 2018 Imprimir

La Universidá va becar a 27 alumnos por que moren nel campus de Mieres, siguiendo l’enfotu del rector, Santiago García Granda, que vieno diciendo dende la so campaña electoral que  “les instalaciones del campus de Mieres tán infrautilizaes”.

Coles mires de potenciar l’edificiu por que se agospien los alumnos, la universidá ta dispuesta a conceder beques pa facilitar que los estudiantes puedan estudiar y vivir nel campus. La previsión ye partir 27 ayudes de 2.400 euros caúna para sufraga-yos l’agospiamientu. Con esta cuantía y atendiendo a los precios del cursu anterior, tendríen cubiertu’l 75% del agospiamientu.

Esti respaldu económicu va destináu a alumnos de la Universidá d’Uviéu que vaigan morar fora de la so casa familiar nel cursu académicu 2018-2019. Queden escluyíos aquellos que tengan baca Erasmus. La convocatoria entá nun se fixo pública, pero fadrase nes próximes selmanes.

La residencia, allugada xusto al llau del edificiu d’investigación del campus de Mieres, foi inaugurada en 2012 con 112 places, pero hasta agora namá foi riquida pa estancies temporales. La intención inicial yera cuntar con un ocupación del 50% nos trés primeros años, anque nunca llogró algamar nin siquier el 30%. Los representantes municipales hai tiempu que ponen de manifiestu la baxa ocupación d’esti equipamientu y lleven años reclamando a la institución académica una solución.

  Categories: