La Universidá axusta en dos millones el so presupuestu pa 2018

El Conseyu Social de la Universidá d’Uviéu celebró esta selmana les xuntes de la so comisión económica y el so plenariu. Nesti últimu alcuentru aprobó por asentimientu los presupuestos pal próximu exerciciu, que tuvieron qu’agayase “nunos dos millones” pola prórroga de les cuentes qu’activó’l Gobiernu rexonal el pasáu 22 d’avientu.

Nel Conseyu Social esplicaron que “arriendes de la prórroga atopamonos con que la resultancia nun yera la prevista, lo qi’ obligó a faer un axuste de cifres inevitable”, un axuste que cifren en redol a los dos millones d’euros. Primeramente, la Universidá prevía pal añu que vien unos presupuestos que xubíen a 206.180.712 euros, seis millones más que l’añu en cursu. D’esta cantidá, 137,1 millones diben proceder, según el proyectu presupuestariu del Gobiernu, del Principáu. Sicasí, y pese al axuste, según el Conseyu Social va caltenese “una cierta estabilidá presupuestaria gracies al respaldu del conveniu de financiamientu tresañal”. Nel Conseyu Social presten, coles mesmes, “l’esfuerzu realizáu polos equipos de xerencia, del rectoráu y de la Dirección Xeneral de Presupuestos de la Universidá pa incorporar estos axustes”.

Mientres el plenu d’esti martes, el Conseyu aprobó tamién por unanimidá’l plan estratéxicu de la Universidá d’Uviéu 2018-2020, que recueye acciones por un valor envaloráu en 52,5 millones, ente les que destaquen el remocicamientu del personal docente, la puesta en marcha d’un programa d’afitamientu de talentu y la meyora de la eficiencia enerxética de los edificios. Pa contribuyir al cumplimientu de los oxetivos del plan, el próximu añu va constituyise un grupu de trabayu dientro del Conseyu Social. Tamién s’aprobó’l plan d’actuaciones pa 2018, que va incluyir, ente otros, xuna auditoría del presente exerciciu en mayu.