La Universidá aportuna en qu’El Cristu ha tener mini pisos d’estudiantes

La Universidá aportuna en qu’El Cristu ha tener mini pisos d’estudiantes
26 febreru 11:45 2018 Imprimir

La Universidá aportuna en qu’El Cristu ha tener mini pisos d’estudiantes nel  alderique sobro ‘Los terrenes del antiguu HUCA: un espaciu pa toos’ nel que participó  Marta Hernando, vicerrectora de Recursos Materiales y Tecnolóxicos.

L’Hospital Universitariu Central d’Asturies treslladóse va cuatro años a La Cadellada dexando 220.000 metros cuadraos de terrenes ensin un proyectu claru. “El futuru de la Universidá ta n’El Cristu. El nuesu oxetivu sería que tolos estudios concentraren nesti espaciu y tamién nos gustaría que se construyeren residencies y mini pisos onde vivieren los universitarios. Amás, habría sales d’estudiu y d’esposiciones que non solo seríen aprovechaes polos estudiantes, sinón tamién por tolos uvieinos”. Son les palabres coles que Marta Hernando, vicerrectora de Recursos Materiales y Tecnolóxicos, quier dexar afitao que la institución académica dexa de manifiestu qu’el so interés por concentrase n’El Cristu sigue.

Pronunciaoles nel alderique ‘Los terrenes del antiguu HUCA: un espaciu para toos’, entamáu pola agrupación local de Ciudadanos nel Palaciu d’Esposiciones y Congresos, y nel que tamién participó l’arquiteutu Álvaro Alcón, l’abogáu Julián Bravo, el voceru de Ciudadanos nel Conceyu, Luis Pacho, y el coordinador Jorge Fernández Mier.

Ciudadanos sofita la visión de la Universidá pero primero de too pide, dixo Fernández Mier, qu’esti espaciu uvieín nun acabe en manos de los «especuladores». Una cuestión que tarrecen porque «los poderes públicos tán amosando pasividá con esta tema». Pela so parte, Julián Bravo sorrayó que «llevamos cuatro años con estos terrenes paraos ya inda nun tramitemos los preseos urbanísticos». El procesu total nun va tar hasta «dientro de catorce años», envaloró.

  Categories: