Portada Sociedá La UNESCO alerta sobre’l peligru d’estinción de la llingua asturiana

La UNESCO alerta sobre’l peligru d’estinción de la llingua asturiana

by asturnet

La celebración esti llunes 21 del Día Internacional de la Llingua Materna pola UNESCO dio pie al organismu mundial pa llanzar un mensaxe pol peligru d’estinción nel que s’alcuentren anguaño más de la mitá de los idiomes del mundu. La UNESCO asitia al asturiano-lleonés, xunto al aragonés, el gaélico irlandés y el bretón, como les llingües más amenazaes d’estinción del continente européu.

El director xeneral del organismu mundial, Koichiri Matsura, dio a conocer datos que confirmen una intensificación nel procesu de desaparición de les llingües. Según les sos propies palabres: “en promedio, desaparez una llingua cada dos selmanes”, dixo’l cabezaleru de la UNESCO, en París, citando el informe “Hacia las sociedades del conocimiento”, publicáu en payares de 2005.

Los datos remanaos pola UNESCO caltienen que nun futuru cercanu van desaparecer 700 idiomes nel continente americanu, 200 n’Africa, 80 n’Asia y 40 n’Europa. Ente les llingües que s’alcuentren en riesgu d’estinción tán la provenzal (occitanu) y bretona (Francia); asturiana-lleonesa y aragonesa (España); gaélica (Irlanda), y mataco y guarayo (Bolivia), ente otres.

Tamién te podria gustar