La Uiquipedia n’asturianu entama la II Quincena a Sextaferia hasta’l 9 d’avientu col obxetivu d’ameyorar conteníos

27 11:19 2013 Imprimir

La Uiquipedia n’asturianu vieno acabante d’entamar esti llunes pasáu la II Quincena a Sextaferia que va desenvolveses hasta’l 9 d’avientu col obxetivu d’ameyorar conteníos. La Quincena a sestaferia ye un proyeutu que foi entamáu al envís d’ameyorar, enantar y encadarmar la Uiquipedia a lo llargo d’un periodu de quince díes y d’esta miente, ufrir y consiguir una mayor calidá del proyeutu d’enciclopedia llibre n’asturianu, faciendo d’ésta una erbía más útil y dexando afitada una ferramienta perbona y afayadiza pal espardimientu del asturianu na rede.

A lo llargo d’estos quince díes lo que se pretende algamar ye una meyora de los conteníos de la enciclopedia, iguar errores ortográficos, de uiquificación o de conteníu, estandarizando al mesmu tiempu’l rexistru llingüisticu y categorizando y remocicando les páxines.

El trabayu d’estos quince díes quier facese especialmente empobináu a les seiciones del Tradubot, que son los artículos que se refieren a los acontecimientos hestóricos rexistraos nos distintos años que van dende 1201 a anguañu.

Non tolos artículos qu’han ser iguaos a lo llargo de la Quincena a sestaferia apaecen nos enllaces del proyeutu, polo que ye necesario güeyar categoríes y llistes d’artículos. Exemplu: Non toles plantíes de los países son iguales, ye una cosa a remocicar y nun apaez en nengún enllaz.

Los organizadores de la Quincena encamienten amás que ye importante procurar nun crear artículos sinón remocicar los yá esistentes.

Una hestoria de cásique 10 años

La edición n’asturianu de la Wikipedia perpasó n’Ochobre los 19.000 artículo, con una entrada sobro la ‘Hestoria de la Llingua catalana‘ que foi a ser la númberu 19.000. Un fechu que s’algamó dientro de la I Nit de la Llengua al Món Dixital, celebrada en Barcelona y na que Vítor Suárez participó en representación de la llingua asturiana, como Vicepresidente d’Iniciativa pol Asturianu.

La Uiquipedia asítiabase asina, depués de cásique 10 años de xera dende qu’entamra en 2004, como l’idioma númberu 100 con más artículos nesta enciclopedia dixital, 63 posiciones perbaxo del puestu 37 qu’ocupaba nel 2005, cuando la ‘wiki’ n’asturianu cuntaba con 3.000 entraes y yera una de les más actives.

Anguaño’l crecimientu de la Uiquipedia n’asturianu ye enforma más sele y nun algama les mil entraes por añu, razón pola que se vien agora a sofitar un llamamientu a los interesaos en collaborar pa que seyan más activos.

  Categories:
Loading Facebook Comments ...