La UABRA entamó la so primer edición agospiada pola sociedá canguesa

03 agostu 07:39 2010 Imprimir

El Conseyeru d’Educación y Ciencia, José Luis Iglesias Riopedre,calificó esti llunes a la Universidá Asturiana de Branu (UABRA) como un exemplu a siguir pa esparder la cultura asturiana, na inauguración d’est proyeutu qu’entamen la Universidá d’Uviéu y l’Academia de la Llingua, colsofitu de la Conseyería d’Educación y Ciencia y l’Ayuntamientu de Cangas del Narcea, villa na que tará la so sede permanente.

La Universidá Asturiana de Branu foi presentada nun actu nel salón del institutu públicu de Cangas nel que tamién participaron el Vicerrector d’Informática y Comunicaciones, Víctor Guillermo García García; la Presidenta de l’Academia de la Llingua, Ana Cano; l’Alcalde de Cangas, José Manuel Martínez; y el Direutor de la UABRA, Xosé Antón González Riaño. Un actu nel qu’hebo una presencia granible de la sociedá canguesa y qu’amuesa l’aciertu de tornar a Cangas depués de dellos años nos que los cursos de branu de l’Academia se desenrrollaren n’Ibias, conceyu d’onde costó enforma a l’Academia marchar esti añu pela granible acoyida que Santantolín ufrió siempres a los participantes nesos cursos.

El Conseyeru d’Educación, que fixo’l so discursu dafechu n’asturianu como tolos demás participantes nel actu, definió la UABRA como aventura formativa y pedagóxica, queriendo dexar afitao que’l Principáu d’Asturies yá completó’l desendolcu curricular de la llingua asturiana en toles etapes educatives: por mor d’ello felicitose y felicitó a les instituciones presentes como exemplu a siguir nel dificil procesu nel que participen.

La presidenta de l’Academia de la Llingua Asturiana, Ana Cano, nun dexó de facer un llamáu na so presentación a que la oficialidá ye la meta que tien l’Academia, porque ensin ella nun hai futuru pa la UABRA y pa los falantes d’asturianu. Los Cursos y xeres complementaries desendólquense hasta’l 13 d’agostu y nellos van participar al rodiu de 150 persones. Esti mesmu llunes, dientro de les Actividaes Abiertes d’esta edición de la UABRA, tuvo llugar la inauguración, a les 12:00 hores, de la esposición del artista Adolfo Manzano «pequeñes nubes nel cielu, nel xardín xuxurios» na Casa de Cultura “Palaciu Omaña” de la villa canguesa.

  Categories:
Loading Facebook Comments ...