La TPA emite “Inception” doblada al asturianu nel Día d’Asturies

by redacción asturnews | septiembre 7, 2016 6:42 pm

La TPA va emitir a les 22,05 hores d’esti xueves 8 de setiembre’l llargumetraxe ‘Orixe’, doblaxe al asturianu de ‘Inception’, película escrita y empobinada por Christopher Nolan y que protagonicen Leonardo DiCaprio, Ellen Page, Joseph Gordon-Levitt, Ken Watanabe, Tom Hardy, Marion Cotillar, Cillian Murphy, Tom Berenger y Michael Caine

El trabayu de doblaxe d’esti filme d’hai seis años foi realizáu por Gonzali Producciones y empobináu por Illán Gonzali, trabayando tamién nesti proyectu varios alumnos de la Escuela de Doblaxe d’Asturies.

‘Orixe’ estrenose en 2010 consiguiendo 4 Premios Óscar por Meyor Fotografía, Meyor Amiestu de Soníu, Meyor Edición de Soníu y Meyores Efectos Visuales. Tamién llogró 3 premios BAFTA pol Meyor Diseñu de Producción, Meyor Soníu y Meyores Efectos Especiales.

L’argumentu céntrase en cuntar la vida de Dom Cobb (Leonardo DiCaprio), un lladrón especialista nel arte de la estracción de secretos demientres la xente s’alcuentra nun estáu de suañu, cuando la mente ye más vulnerable. So habilidá conviertese nuna referencia del espionaxe corporativu, pero coles mesmes fai d’él un fuxitivu internacional y va llevalu a perder tolo qu’ama.

Gonzali Producciones ye responsable del doblaxe profesional n’asturianu dende 2010, con 17 trabayos realizaos hasta agora, ente los que destaquen ‘Los viaxes de Gulliver’ (2010), ‘El tercer home’ (2011), ‘McLintock’ (2011), ‘La nueche de los muertos vivientes’ (2012), ‘El rostru impenetrable’ (2013) o ‘Harry el suciu’ (2014), estos dos últimos, emitíos delles vegaes pola televisión autonómica. A esi total hai que añedir ‘Diez negrinos’, que ta en procesu de doblaxe.

El repartu d’actores de doblaxe d’esti filme ta formáu por Félix Corcuera (Leonardo DiCaprio), Lorena Armengol (Ellen Page), Valentina Maile (Marion Cotillar), Pablo Moro (Joseph Gordon-Levitt), Carlos Novoa (Tom Hardy), Jorge F. Álvarez (Ken Watanabe), Pachu Viña (Cilian Murphy), José Santa Clara (Michael Caine), Francisco Otero (Tom Berenger), Herminio García-Riaño (Dileep Rao), José Manuel Monteserín (Pete Postlethwaite), José García Fernández (Ryan Hayward), Alfonso Jiménez (Lukas Haas), Eduardo Zulaiba (Michael Gaston), Bruno Petrelli, Raquel Menor, Sara Fernández, Estefanía Lada, María Luisa Fernández, María Guibert y Hugo García.

Source URL: http://asturnews.com/la-tpa-emite-inception-doblada-al-asturianu-nel-dia-dasturies/