La TIA d’Avilés ampliase a pontes y díes non lectivos

La TIA d’Avilés ampliase a pontes y díes non lectivos
21 ochobre 13:17 2019 Imprimir

Los Talleres Infantiles d’Avilés (La TIA) estienden la so programación a tolos períodos vacacionales del cursu escolar y a toos les pontes y díes non electivos del mesmu períodu. Asina lo anunció esta selmana la conceyala d’Educación Nuria Delmiro. Destacó qu’esta midida “ye la primera de la área d’Educación que ponemos en marcha dientro compromisu electoral qu’adquerimos con avilesinos y avilesines nos comicios del pasáu mes de mayu”.

Asina, y per primer vegada, el Conceyu d’Avilés pon a disposición de toles families esti recursu educativu y de conciliación en tolos periodos non lectivos del cursu escolar. Delmiro esplicó que “el nuesu oxetivu ye siguir ufiertando ayudes a la conciliación a les families non yá nes vacaciones escolares, sinón tamién neses pontes que se suman con díes non lectivos, por casu, los dos de llibre elección de cada conceyu. La TIA ye una alternativa esitosa y consolidada n’Avilés qu’ufiertamos por que les families tengan una alternativa para conciliar el so trabayu cola atención a los sos fíos y fíes”. Confirmó que tamién nestos nuevos períodos van aplicase bonificaciones d’hasta’l 80% en función de la renta y el númberu de miembros de la unidá familiar; y va haber serviciu de comedor, igualmente bonificáu.

El primer periodu non lectivu ye’l programáu pa esti mesmu mes, en concretu pa los díes 30 y 31 d’ochobre, díes nos que la TIA va sofitar a aquelles families que precisen conciliar la so vida familiar y llaboral, poniendo a la so disposición actividaes educatives y comedor, n’horariu de 7:30 a 15:30 hores, en dos Centros d’Avilés: CEIP Quirinal y CEIP Versalles.

Más información

  Categories: