La Tertulia Malory escueye «La Chelita», del dibuxante y músicu Ruma Barbero, como meyor llibru n’asturianu del 2012

La Tertulia Malory, de L’Entregu, escoyó como meyor llibru n’asturianu de tolos editaos nel 2012 la novela gráfica La Chelita, del dibuxante Ruma Barbero. El xuráu tuvo formáu polos escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 1 de Payares de 2013. El xuráu destacó nel acta del fallu “el dominiu de tolos recursos del llinguaxe del cómic. Un ritmu narrativu áxil y rellumante a les órdenes d’un guión perfechu col que conquista l’alma del llector”.

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu nuna fecha tovía ensin determinar. Amás, el colectivu lliterariu con sé en L’Entregu va mercar 20 exemplares de la obra pa ofrecer como regalu protocolariu nos actos organizaos o onde participe la Tertulia Malory.

Esta ye la segunda vez que’l grupu concede esti premiu, l’añu anterior resultó ganadora La ñeve del Cuquiellu, poemariu obra de Xabiero Cayarga. Con esti gallardón los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu. Los entamadores consideren que yera «pernecesariu» un premiu d’estes característiques nel ámbitu de la lliterartura asturiana tanto poles posibilidaes de visibilidá y proyección social que-y pue dar a la creación lliteraria como pola contribución al prestixu del asturianu como llingua.

La Chelita, ye una novela gráfica de 160 páxines, onde se narren les vivencies de Charo Borreguero, una psicóloga salmantina qu’en 1992 aporta a El Salvador pa formar mayestros y ayudar na recuperación d’un país qu’aniciaba’l camín de la paz depués d’una sangrina guerra civil. Y onde ensin embargu va acabar trabayando pa la organización pro-drechos humanos Madeleine Lagadec, colaborando na elaboración del Informe pa la Comisión de la verdá pa El Salvador de les Naciones Uníes. Un viaxe personal y ablucante pela historia más recién d’América Llatina.

Ruma Barbero (Somio, Xixón, 1971) Llicenciáu en Belles Artes pola Universidá de Salamanca. Pertenez a los grupos de folk Felpeyu y Los Citriquinos. Nel mundu del cómic diose a conocer na revista escolar El Maguillo y en El Llapiceru. Participó na editorial Cactus Comics onde asoleyó Los Aguarones, xunto con Xosé Antón García Sampedro “Son”. Nel añu 2003 algama’l primer premiu del Concursu de comics de la Comarca de la Sidra pol trabayu Marcianaes, títulu qu’usa pa la tira cómica que asoleya nel selmanariu Les Noticies nel periodu del 2004 al 2010. Nel añu 2009 gana’l premiu Alfonso Iglesias de Cómic en Llingua Asturiana por Manzajú, afitándose como ún de los grandes del mundu de la viñeta asturiana. Anguaño pueden vese los sos trabayos nel blog «Fundición Príncipe de Astucias» y nel fanzine dixital «Aguantando Cachones».