Portada Sociedá La Tarxeta ciudadana de Xixón ye referencia n’Europa

La Tarxeta ciudadana de Xixón ye referencia n’Europa

by redacción asturnews

El Conceyu de Xixón cola so tarxeta ciudadana foi escoyíu pola iniciativa URBACT ente distintes bones práctiques Europees pa tresferir el so modelu a otres ciudaes.
El Conceyu de Xixón/Xixón va liderar demientres 6 meses una rede de tresferencia na que van participar otres ciudaes que camienten enllantar o ameyorar los sos servicios venceyaos a la tarxeta ciudadana. Sol nome de CARD4ALL, el nuesu proyectu va brindar l’accesu a los servicios y recursos de la ciudá al empar que s’ameyora la participación ciudadana.

Cada rede de tresferencia ta compuesta per trés países na so primer fase de trabayu, siendo Xixón líder del proyectu CARD4ALL que conforma xuntu a Suceava (Rumanía) y Jurmala (Letonia). Tiempu mientres el cuál va cuntase col sofitu d’un espertu nel sector que va emponer a les ciudaes nesti procesu, según nel desenvolvimientu de nueves funcionalidaes. Una vegada remataos los seis meses de tresferencies piloto, nueves ciudaes van poder xuntase a la rede aumentando asina la visibilidá de la nuesa tarxeta ciudadana y les sinergias ente les mesmes.

La rede liderada pol Conceyu de Xixón va desenvolver el so trabayu nel campu de les nueves tecnoloxíes, convirtiéndose na única bona práctica que trata esta temática de les 25 redes de tresferencia escoyíes, una y bones la mayoría d’estes céntrense na inclusión social y participación ciudadana. La selección de la tarxeta ciudadana como bona práctica europea pa liderar una rede de tresferencia asitia entá más a la nuesa ciudá nel contestu internacional y de desenvolvimientu tecnolóxicu innovador.

Tamién te podria gustar