La Tarrancha y Suaia eta Lahaine cierren esti vienres Glayíos/Oihuak

El ciclu d’intercambiu musicales Glayíos/Oihuak llega a la so fin esti vienres 18 d’avientu col quintu y últimu conciertu de 2015: La Tarrancha presentando’l so nuevu discu ‘Elefantes Na Cacía’ y el grupu de hiphop-reggae Suaia eta Lahaine.

El conciertu tién amás del la presentación del discu de La Tarrancha la presencia del grupu de hiphop-reggae Suaia eta Lahaine, aportando per primer vez a Asturies pa presentar el so trabayu ‘Herrima’. Y dempués del conciertu habrá folixa post-conciertu con entrada llibre en La Calleja d’Uviéu. 

Esti quintu y últimu conciertu d’esti ciclu d’intercambios musicales ente grupos d’Asturies y País Vascu va tar protagonizáu pola fusión, el hiphop y los ritmos xamaicanos. La banda de “mezigayu ska” La Tarrancha y Suaia eta Lahaine col so amiestu de reggae, hiphop y electrónica, van ser los encargaos de cerrar esti proyectu.

La Tarrancha van dende’l ska-reggae a tolo que se-yos ponga per delante: soníos latinos, asturianos, rusos… funk, swing, pachanga… pura fusión, o como dicen, “mecigayu ska”. Ye amás una banda divertida que nes sos lletres y nel so directu cargáu de ritmu y pa tolos públicos busca axitar conciencies al traviés del humor y la ironía. ‘Elefantes Na Cacía’ ye’l so nuevu discu que presenten n’Uviéu con esti conciertu.

Suaia eta Lahaine ye’l proyectu conxuntu de Gorka Suaia -alter ego de Askapen Sound Systema- y Endika Lahaine -mc de la marxen izquierda del Nervión militante en 121 Krew-. ‘Herrima’ ye’l so primer discu, una coctelera de hiphop, drum&bass, reggae… cola pallabra como arma y la canción como argumentu.

Folixa postconciertu

El conciertu va ser a les 22 hores en La Calleja d’Uviéu y les entraes anticipaes tán a la venta en dellos locales. Acordies a la filosofía del proyectu d’ufiertar música de calidá a precios afayadizos, van costar cinco euro anticipada y ocho en taquilla. Amás va esistir una ufierta col oxetivu de fomentar la venta de discos y sofitar asina la industria musical: entrada anticipada xunto a un cedé de cualesquier de los dos bandes, por doce euros.

Tres l’actuación, va tener llugar una fiesta postconcierto gratuita na mesma Calleja na que van pinchar la Glayíos Antisystem Sound Selekters. Asina se cierra ‘Glayíos/Oihuak. Música en Movimientu’, ciclu d’intercambios musicales entamáu por Ixuxú Asturies-Euskal Herria elkartea nel que participaron en xineru Skama la Rede y Skakeitan, en marzu Neña Coyote eta Chico Tornado y Sombra, en mayu Rat-Zinger y Skontra y en noviembre Gose y Fabes de Mayo.