La SOF puxa pa que’l periodista Sid Lowe sía’l pregoneru de San Mateo

La SOF puxa pa que’l periodista Sid Lowe sía’l pregoneru de San Mateo
27 xunu 10:21 2017 Imprimir

1.538 firmes nuna primer entrega para pidir que’l periodista británicu Sid Lowe sía pregoneru de les próximes fiesta de San Mateo, ye’l resultáu de l’enfotu que ta poniendo la Sociedá Uvieina de Festexos (SOF) pa llogralo.

L’Asociación d’Accionistes y Aficionaos del Real Uviéu World Fan Club impulsaran esta recoyida de firmes, que sigue abierta a la ciudadanía, porque creen que Lowe foi una persona clave na salvación del Real Uviéu, énte les dificultaes que’l club de fútbol travesó en 2012. Al traviés de la rede social Twitter, Lowe animó a la compra d’acciones y contribuyó a que se algamara la cifra de dos millones d’euros. Ye por tantu una persona qu’espublizó la imaxe d’Uviéu y el so equipu de fútbol a nivel mundial.

Lowe ye amás un namoráu d’Uviéu desque, en 1996, vieno completar los sos estudios al traviés del programa Erasmus. Hasta-y punxo al so fíu como nome “Charlie Mateo”, comentó’l conceyal de Cultura y presidente de la SOF, Roberto Sánchez Ramos, quien acoyó esta iniciativa pa impulsala al traviés de la Sociedá Uvieina de Festexos, col enfotu de oficilizala nos próximos díes.

Sánchez Ramos entiende que ye la meyor manera de decidir cuestiones como esta, na que la mesma ciudadanía puede treslladar les sos propuestes a los responsables políticos electos “al igual que n’otros procesos participativos que yá s’han promovido na ciudá”. Matías García, de l’Asociación d’Accionistes y Aficionaos del Real Uviéu, esplicó qu’el mesmu periodista deportivu británicu, que mora en Madrid, conoz la propuesta y nun se cree merecedor de tal honor, pero seguru que lo considerará una auténtica distinción.

  Categories: