La sociedá civil reclama nes cais compromisu políticu pa cola Oficialidá

El movimientu de reivindicación llingüística volvio pedir esti xueves nes cais d’Uviéu responsabilidá y compromisu a los partíos políticos pa resolver nesta llexislatura un déficit democráticu que nun almite más aplazamientos, convocáu pola Xunta pola Defensa de la Llingua Asturiana (XDLA).

Alrodiu milenta persones aconceyaron esti xueves alrodiu de la sede del parlamentarismu asturianu, arrodiando la Xunta Xeneral con una “O” d’Oficialidá respuendiendo al llamáu de la Xunta pola Defensa de la Llingua Asturiana (XDLA) pa pidir a les fuerces polítiques favoratibles a la Oficialidá de la llingua asturiana que nun torguen les negociaciones y tengan visión de futuru.

Colos glayíos de “Yá, yá, yá, Oficialidá” y “L’asturianu, llingua oficial” que lleven faciendo campaña al mivimientu reivindicativu dende va décades, la sociedá civil dexó bien a les clares la so posición, reclamando bon xacíu a los partíos políticos que se manifestaren nos sos programes electorales o a lo llargo de la llexislatura proclives a reformar l’Estatutu y algamar la oficialidá.

La XDLA dió llectura a un comunicáu pidiendo compromisu a los partíos, delantre de representantes de muchos d’ellos, como Rafa Palacios de Podemos o Diego Valiño de “Socialistes pola Oficialidá” ente otros representantes de Izquierda Xunida y Foro comprometíos pa cola propuesta d’Oficialidá.