La sociedá asturiana reclama la Oficialidá esta tarde n’Uviéu

by asturnet | mayo 7, 2010 4:25 am

Güei, vienres 7 de mayu, va celebrase’l XXXI Día de les Lletres Asturianes, con una manifestación pola reconocencia del estatus d’oficialidá pa la llingua asturiana. La convocatoria faila la Xunta pola Defensa de la Llingua Asturiana y yá confirmaron la so presencia Partíu Asturianista, UNA y Andecha Astur, ente otres formaciones.

La manifestación va entamar a les 19:30 hores na Estación del Norte, d’Uviéu, y va siguir pela cai Uría hasta les puertes del Campoamor, onde va dase llectura al discursu añal de la XPDLLA.

[1]

Academia de la Llingua Asturiana celebra darréu, a partir de les ocho y media la tarde, la so Xunta Añal Estraordinaria, onde van nomar un nuevu miembru, el xurista ya investigador lleonés Nicolás Bartolomé Pérez, al qu’Asturnews entrevista güei[2]. Amás, nel entamu, va cantar el Che de Cabaños y va tocar la gaita Rodrigo Joglar, miembru del grupu folk Verdasca..

L’actu va siguir col discursu institucional de la presidenta Ana María Cano González, una esbilla de testos del númberu últimu de Lletres Lliterariu, y un conciertín d’Alfredo González.

Endnotes:
  1. [Image]: http://asturnews.com/bancofotos/fotos/2/4828.jpg
  2. güei: http://asturnews.com/index2008.php?idn=9708

Source URL: http://asturnews.com/la-socieda-asturiana-reclama-la-oficialida-esta-tarde-nuvieu/