La Sinfónica de Sevilla crea una plataforma de vídeos baxu demanda

La Real Orquesta Sinfónica de Sevilla (ROSS) pon en marcha la so nueva plataforma audiovisual de vídeos baxu demanda que ye pionera n’España y onde podrán vese tolos conteníos xeneraos pola ROSS y los maestros convidaos nos sos conciertos, “llevando la música y la cultura a cualquier rincón del mundu” según esplicó’l xerente de la orquesta, Pedro Vázquez.

La páxina www.rossevilla.es va actuar como una plataforma VoD (Video on Demand) con un funcionamientu similar a les plataformes qu’ufierten películes y series de televisión pero, nesti casu, “los conteníos van ser los mesmos conciertos realizaos, según documentos históricos de gran valor y conteníos educativos”.

La plataforma que se presenta n’español, y bien ceo va traducise al inglés, va siguir calteniendo tola información relevante relativa a la so actividá, como son l’axenda de conciertos, noticies, vienta d’entraes y contactu, ente otros servicios.

L’oxetivu d’esta plataforma ye la internacionalización de l’actividá de la ROSS, siendo d’esta manera una de les cinco plataformes propies d’orquesta más importantes na actualidá, y en concretu la primera d’esti tipu n’España. Esti mediu va ufiertar la posibilidá d’esfrutar de los conciertos dende cualquier dispositivu, 24 hores al día, 365 díes al añu, ensin llendes de visualizaciones o de países. Amás, el soníu va ser d’alta calidá, según les imaxes de vídeu.

El delegáu de Cultura del Conceyu de Sevilla, Antonio Muñoz, señaló que cristalicen les novedaes na xestión de la ROSS con esta plataforma que supon una ventana al mundu pa dar a conocer la música de la orquesta y añedió que “esta ferramienta dexa colase nos salones de tar, conservatorios y cualquier habitación pa dar a conocer la orquesta y sirvir de promoción de Sevilla y Andalucía”.