La SGAE vota contra la polémica reforma estatutaria de so presidente

La Sociedá Xeneral d’Autores y Editores decidió esti xueves nuna de les asamblees xenerales más polémiques nun sacar alantre nin les cuentes de 2017 nin los nuevos estatutos propuestos pol so presidente, José Miguel Fernández Sastrón.

Esta reforma estatutaria, que precisaba dos tercios de los votos para salir alantre, proponía, entre otros puntos, que’l presidente de la entidá tendrá de ser nomáu y cesáu directamente polos socios na Asamblea Xeneral, lo que dexaría a Fernández Sastrón poder presentase a la reelección.

Amás, tamién se proponía la eliminación del Conseyu de Dirección y l’amenorgamientu, a la metá, del númberu de miembros de la Xunta Directiva.

La reforma vien motivada polos cambeos introducíos na Llei de Propiedá Intelectual, derivaos del Real Decreto-llei 2/2018, pol que s’incorpora al ordenamientu xurídicu español la Directiva 2014/26/UE del Parlamentu Européu y del Conseyu, y la Directiva (UE) 2017/1564 del Parlamentu Européu y del Conseyu. Una tresposición que llevó al Conseyu de Ministros a aprobar la tramitación urxente d’un anteproyectu de llei qu’obliga a les entidaes de xestión como la Sociedá Xeneral d’Autores y Editores (SGAE) a modificar los sos estatutos para “ameyorar el so gobiernu internu, tresparencia y rindición de cuentes”.

Anque se trata d’un reforma d’estatutos que se tien que llevar a cabu sí o sí, la propuesta por Fernández Sastrón cuntaba con una fuerte oposición encabezada pola metá de la Xunta Directiva, y por un manifiestu que foi robláu por 270 autores, entre los que tán Pedro Almodóvar, Álex de la Ilesia o Isabel Coixet.

Al nun salir alantre la so propuesta, Fernández Sastrón, adelantró nuna entrevista’l miércoles que nun contemplaba “dimitir, pero sí que tien claro que si nun sale la reforma qu’él presentó va haber que faer unos nuevos “si nun-y queda más remediu”.