La SGAE refuga los nuevos estatutos y abre la vía a la intervención

La SGAE refuga los nuevos estatutos y abre la vía a la intervención
29 avientu 13:50 2018 Imprimir

L’Asamblea Xeneral Estraordinaria de la Sociedá Xeneral d’Autores y Editores (SGAE) decidió esti xueves, con 9.220 votos en contra, refugar la reforma estatuaria a la que la entidá ta obligada para afaese a la nueva Llei de Propiedá Intelectual.

La reforma estatutaria, que tenía que ser aprobada con una mayoría necesaria de dos tercios, nun salió adelantre dempués de que d’un total de 22.536 votos, 9.220 fueron en contra y 13.034 a favor. Con esta resultancia, la entidá nun taría cumpliendo’l requerimientu impuestu pol ministeriu de Cultura (que vence mañana), quien agora, según l’artículu 192 de la Llei de Propiedá Intelectual, puede empecipiar los procedimientos para intervenir a la mayor entidá de derechos d’autor d’España.

En conociendo’l refugu a los nuevos estatutos, el Ministeriu de Cultura y Deporte anunció que va riquir esti vienres a la SGAE qu’unvie les actes de l’asamblea xeneral estraordinaria nun plazu de cinco díes para tomar “una decisión acorde cola Llei”. Enagora, el departamentu encabezáu por José Guirao asegura tar “esmolecíu poles resultancies de les votaciones que conoció al traviés de la prensa”. “Los artículos periodísticos paecen reflexar que nun s’iguaron los aspeutos que solicitó Cultura al traviés d’un apercibimientu que’l so plazu vence mañana”, añedieron .

Una vegada conoza “los términos esactos” de la xunta de l’Asamblea, el Ministeriu va evaluar la situación y va tomar xuna decisión dientro de los parámetros que preve la Llei de Propiedá Intelectual “n’ares de la preservación del interés xeneral de los asociaos para protexer los lexítimos derechos de el autores y demás titulares de derechos que son miembros de la SGAE”.

Mientres l’asamblea xeneral estraordinaria los socios de la SGAE sí que dieron el so sofitu a la normativa de repartida de derechos d’autor con 12.022 votos a favor (el 54,74%), 9.755 en contra (el 44,42%) y 185 astenciones.

Asina, la entidá aceptó lo que marca la nueva Llei de Propiedá Intelectual que se va aprobar el próximu mes de febreru: poner un tope del 20 % a lo recaldao per cada autor pola emisión de la so obra nun horariu nocherniegu, la denominada “rueda de les televisiones”. Tratase del mesmu tope impuestu pol laude emitíu’l pasáu añu pola Organización Mundial de la Propiedá Intelectual (OMPI). Un porcentaxe col que se pon fin a la llamada práctica de la rueda”, denunciada en 2013 énte la Fiscalía Anticorrupción pol expresidente de la SGAE Antón Reixa, y que trés años más tarde foi oxetu d’una operación policial contra’l fraude nel cobru de derechos d’autor de pieces musicales que s’emitíen en cadenes de televisión n’horariu nocherniegu y que podía xubir a 100 millones d’euros.

Como últimu puntu del día, l’asamblea xeneral estraordinaria refugó, col 53% de los votos, la repartida de los beneficios d’avientu. Según los datos ufiertaos pol presidente de la SGAE, José Ángel Hevia, la selmana pasada, na repartida realizada esti mes d’avientu (realízase otru en xunu) los socios de la SGAE partiéronse un total de 107 millones, de los cualos 18 fueron destinaos a la música emitida na franxa nocherniega (d’esos la metá va destináu a autores y l’otra metá a editores musicales).

  Categories: