La SGAE refuga afaer los sos estatutos a la Llei de Propiedá Intelectual

La SGAE refuga afaer los sos estatutos a la Llei de Propiedá Intelectual
22 febreru 08:45 2016 Imprimir

Los 845 socios asistentes y representaos na Asamblea y Pre-asamblees  (15.829 votos representaos) de la Sociedá Xeneral d’Autores y Editores (SGAE) refugaron les reformes estatutaries, nel marcu de l’Asamblea Xeneral Estraordinaria de socios celebrada’l xueves, 18 de febreru, en Madrid.

Según informó la entidá, la convocatoria de l’asamblea per parte de la Xunta Directiva’l pasáu 17 d’avientu respuende a lo esixío nel cambéu de la Llei de Propiedá Intelectual (a valir dende’l 1 de xineru de 2015), pola que les entidaes de xestión n’España han modificar los estatutos que les rixen. En concretu, puntualizó que se trataba d’afaer los estatutos de la SGAE a la Llei 21/2014, de 4 de noviembre, pola que se modificar el Testu Refundíu de la Llei de Propiedá Intelectual, aprobáu por Real Decretu Lexislativu 1/1996, de 12 d’abril (LPI).

Nesti sentíu, recordó que, nel casu de la SGAE, un cambéu nos sos estatutos hai de ser aprobáu polos sos socios con derechu a votu, polo que la Xunta Directiva de la Sociedá Xeneral d’Autores y Editores convocó esta Asamblea Xeneral Estraordinaria en Madrid. Con anterioridá, del 8 al 12 de febreru, la entidá celebró Pre-asamblees territoriales n’Andalucía, Aragón, Asturies, Baleares, Castiella La Mancha, Castiella Llión, Cataluña, Canaries, Galicia, Navarra, País Vascu y Valencia. A estes Pre-asamblees taben llamaos los socios con derechu a votu y residencia en diches comunidaes autónomes, según esclarió.

Per otru llau, apuntó que, aprovechando estes xuntes, la Xunta Directiva de la entidá propunxo delles correcciones d’estilu, adaptaciones y concordances en dellos artículos de los estatutos de la entidá, que la so terminoloxía, redacción o numberación quedó obsoleta. Nesti casu, según señaló, los socios tamién refugaron la propuesta con un 50,65% de votos negativos (7.885 votos), un 47,60% de votos afirmativos (7.411 votos) y un 1,7% d’astenciones (272 votos).

  Categories: