La sesta temporada del ciclu Primavera Barroca entama’l día 13 de marzu

La sesta temporada del ciclu Primavera Barroca entama’l día 13 de marzu
05 marzu 10:13 2019 Imprimir

La sesta temporada del ciclu Primavera Barroca, coproducida pol Conceyu d’Uviéu y el Centru Nacional d’Espardimientu Musical, entama’l día 13 de marzu y va ufiertar 6 conciertos nos que podrá esfrutase de los nomes internacionales más destacaos de la música hestórica actual.

Ente los conxuntos incluyíos nel programa alcuéntrense Los Paladins (al pie de la soprano Sandrine Piau) y Café Zimermann amás de los grupos nacionales Alcuerdo 1700, Nereydas, Cappella de Ministrers y Forma Antiqva. La vienta d’abonos remata’l día 2 y a partir del día 5 podrán adquirise les entraes sueltes.

El conceyal de Cultura, Roberto Sánchez Ramos, el director artísticu de la Fundación Municipal de Cultura, Cosme Marina y el director del Centru Nacional d’Espardimientu Musical  (CNDM), Francisco Lorenzo, presentaron la selmana pasada la sesta edición del ciclu Primavera Barroca que se va celebrar del 13 de marzu al 23 de mayu y na que se van dar cita los nomes más destacaos de la música hestórica actual. Na so intervención, el conceyal remarcó cómo n’apenes  6 años, esti ciclu convirtióse n’una “cita indispensable”  nel calendariu musical d’Uviéu. Demostrar, indicó, la vienta d’abonos, que magar cerrase’l día 2 de marzu, “garantiza yá que el 40% de les localidaes de la Sala de Cámara del Auditoriu Príncipe Felipe van tar ocupaes mientres tol ciclu”.  Sánchez Ramos recordó amás que les entraes sueltes podrán adquirise a partir del día 5 de marzu y qu’esisten distintos descuentos que pueden algamar hasta’l 40% del preciu de les entraes.

Pela so parte, Francisco Lorenzo, esplicó qu’amás de los seis conciertos programaos, nestos meses de Primavera Barroca van celebrase, de nuevu, una serie de conferencies entamaes conjuntamente cola Universidá y el Conservatorio Cimeru de Música d’Uviéu. Actividaes y conciertos que respuenden a les llínees maestres y compromisos de la institución nacional, que son “promover y recuperar el patrimoniu musical”, “vertebrar musicalmente’l territoriu español” y “sofitar a músicos y grupos nacionales

Cosme Marina foi l’encargáu de detallar el programa musical d’esta nueva edición. “Seis conciertos del máximu interés que van arrincar cola agrupación Alcuerdo 1700, una de les referencies españoles ineludibles nel ámbitu de la música hispana” que va interpretar l’Oratoriu a San Miguel, que per primer vegada podrá escuchase nesti ciclu. De siguío, -yos Paladins, cola soprano Sandrine Piau van ufiertar sol títulu d’Heroínes, delles aries d’ópera como Giulio Cesara, Ariodante, Alcina, Partenope o Rodrigo, de G.F. Haendel. La tercer formación de la que vamos poder esfrutar va ser Nereydas que cola soprano María Espada como solista , “van centrar na figura d’unu de los creadores señeros del Barrocu español, José de Nebra, con un nutríu programa d’obres instrumentales y vocales que se completa con otru compositores como Giacomo Facco, Domenico Scarlatti y Charres Avison”.  Va Tomar el testigu’l grupu asturianu Forma Antiqva, “que de nuevu, van tar presentes con una de les sos imaxinatives propuestes artístiques: Notte italiana”.  El quintu conciertu va correr al cargu de Café Zimmermann, unu de los grandes conxuntos internacionales centraos nel Barrocu que van presentar el programa tituláu “Bailles y Batalles”.

  Categories: