Portada Conceyos La sesta edición del congresu nacional “Innovación nel sector turísticu” va axuntar a 500 profesionales n’Uviéu

La sesta edición del congresu nacional “Innovación nel sector turísticu” va axuntar a 500 profesionales n’Uviéu

by redacción asturnews

La sesta edición del congresu nacional “Innovación nel sector turísticu”, que se va desenvolver los díes 26 y 27 de payares, va axuntar a 500 profesionales n’Uviéu.

Esta sesta edición del congresu nacional “Innovación nel sector turísticu” foi presentada pol conceyal de la área, Alfredo García Quintana y los máximos responsables de Otea, Jose Luis Álvarez Almeida y Fernando Corrolada. Nesti congresu van amosase y van analizar les nueves tecnoloxíes que se van implementando nel desenvolvimientu de l’actividá turística por que les empreses y los sos trabayadores tean actualizaos.

El conceyal de Turismu, Alfredo García Quintana, presentó’l 6º Congresu Nacional “Innovación nel sector turísticu” que se va celebrar n’Uviéu los díes 26 y 27 de payares. Una cita biañal “yá consolidada n’España”, indicó’l conceyal, pero “na que se va siguir trabayando por que tenga calter internacional” en próximes ediciones. Quintana sorrayó la importancia d’eventos d’estes característiques porque “va atraer a 500 congresistes” y “va contribuyir a ameyorar la formación del sector”.  Una idea que sofitó’l presidente de OTEA, Jose Luís Álvarez Almeida indicando que, por que “el turismu d’Asturies sía un referente, los nuesos empresarios tienen que conocer el sector y tar actualizaos”. Almeida estimó’l sofitu del Conceyu d’Uviéu para sacar alantre esta y otres iniciatives claves para “desestacionalizar el turismu”.

Según detalló Fernando Corrolada, vicepresidente de Otea, a lo llargo de los dos díes de congresu, van desenvolvese 17 ponencies, meses redondes, talleres y conferencies que van impartir 18 espertos veníos de distintos llugares d’España coles mires de treslladar a los asistentes les últimes novedaes en xestión y desenvolvimientu de los negocios turísticos, tanto n’agospiamientu como en restauración, onde tamién se tán produciendo grandes cambeos que son menos conocíos.  Conocer estos procedimientos “va ameyorar la nuesa competitividá y ye qu’ésta nun depende del tamañu de la nuesa empresa sinón de la nuesa axilidá”.

Tamién te podria gustar