La Semiente fina esta selmana so campaña de llibros

by redacción asturnews | septiembre 14, 2015 9:00 pm

Esti vienres fina la Campaña de Recoyida de Llibros y Material Escolar que por cuartu añu consecutivu entama’l centru social La Semiente en L’Entregu.

L’añu pasáu atendiose a más de 120 estudiantes apurriéndo-yos llotes de llibros y material escolar. Hasta agora recoyéronse llibros y material escolar donáu por vecinos y nes huches asitiaes pa tal efectu en distintos comercios y locales hosteleros recaldáronse mas de 600 euros que se sumen a otres donaciones de particulares.

Nesta segunda fase, qu’entamo’l día 7 de setiembre, el centru social “La Semiente” asitiáu na Cai Nueva nº1 de L’Entregu, va apurrir el material y los llibros pa los/les escolares qu’asi lo reclamen, hasta’l día 18 de Setiembre, n’horariu de 5 a 7 la tarde.

Amás, esti local autogestionáu sigue recibiendo llibros de testu d’anguaño y del añu pasáu, de tolos cursos, escueles, institutos y colexos, tol material escolar que la xente pueda traer y tamién donaciones de dineru pa faer llotes de material escolar.

Ha facese alcordanza que nun ye obligatoriu traer coses pa poder llevar, y que nun pue asegurase que tola xente atope lo que busca.

A lo último, La Semiente quier dar les gracies a toles persones que contribuyeron echando dineru nes huches que se distribuyeron pola Cuenca y a los comerciantes y chigreros que les punxeron nos sos establecimientos, Amás recuerden qu’esi dineru va revertir na cuenca, una y bones el material escolar va mercase en pequenes llibreríes y papeleríes de la zona. Pequeñes per comparanza colos grandes centros comerciales, pero bien grandes pola solidaridá y el sofitu qu’amosaron.

Source URL: http://asturnews.com/la-semiente-fina-esta-selmana-so-campana-de-llibros/